武俠故事創作之中，主角的成長佈局及性格極其重要，只要主角受落，讀者關心他的遭遇、動向，可算已是成功了一半！
中華英雄内的華英雄本人，是典型的成長模式設計，由堪苛的遭遇開始，一直艱苦掙扎向上，最後成功，一般讀者最愛呢種模式成長嘅主角，憑意志、毅力、實力爭取成功喎，試問邊個唔想吖！
除却以上由低捱起嘅成長人物模式，另一種好危險嘅設計，就係所謂「含金鎖匙出世」嘅主角，A君一出世就投得好胎，父親係天下第一高手，自己又得天獨厚，乜都醒過人，遭遇更加冇得頂，逢凶化吉，處處遇貴人，呢種咁掂嘅主角，此對現代社會，同嗰D含金鎖匙出世嘅花花公子有乜分别呢？要將以上設計嘅主角描寫得受廣大讀者歡迎，肯定事倍功半！
但係偏偏喺唔少主角設計，都會有類似嘅情形出現，原因好簡單，因爲D主角仔醒目嘅話，故事題材、枝節都會較容易攪得豐富。即係話，主角初出塲嗰陣，會好睇D，多嘢睇D，但係佢嘅好處、叻嘢、武功係咁加，危機嚟喇，讀者開始覺得呢位主角太醒囉，幾大件事都獨力攪妥，作者唯有繼續設計大鑊嘢，主角一次此一次威猛，終於到咗過份叻嘅危險線，D讀者會質疑：「嘩！咁醒，神仙咩！」。而爲咗個主角。絕對困境仍然好醒目解决難題，作者實在唔能夠唔寫到個主角成爲神仙咁樣。好喇，乜都主角叻晒，設計佈局已經冇乜意義，重玩乜呢？行到絕路囉！
之不過以上嘅主角成長佈局設計重未算最難討好，君不見某D主角成世性格不變，由細到大，無論點都好，毫無成長可言，作者一味加叻嘢喺個主角身上。好嘢，又憑幾度新板斧多玩多一個段落！呢位主角，表面上係一個人，實則係冇内涵、冇性格、冇特質嘅木頭人。
咁重未算陰公，如果幾個主角毫無分别，人人一個瓣，咁重死，點令D讀者鐘意主角門嘅内涵呢！？
近年電視劇流失大量觀眾，人口增加，睇電視人數反而减少，劉定堅就認爲喺創作方面，D編劇們功力不足有好大關係。其他傳媒喺故事創作方面亦極少有突出嘅既表現，劣作滿天飛。唉！D嘢咁水，唔卑人鄙視就奇囉，賺到錢係一時嘅得益，但係作品流傳十年、百年、繼後得到嘅萬世批評會係點呢？醜足一世，該煨囉。