曾經喺某一期嘅中華英雄週記，馬仔突然好鬼感觸，寫咗段對後起新秀主筆感慨嘅說話。
記得有時同佢度橋度到好辛苦，腦細胞迅速相繼釘釘，馬仔會好冇瘾，望向下面，全世界D新秀主筆都行緊以前自己闖過嘅路，佢哋都有理想、有目標，所以好有鬥志。但係自己又如何呢？銷量巳經係第一，畫功又第一、故事又係第一，重追求D乜呢？有嘢追求，咁點呀？
作爲編繪漫畫嘅主筆，缺乏動力創作，突破一向範疇，無疑係好鬼痛苦，所以馬仔不時刻意求變，乜鬼都要試吓新鮮D，就例如封面製作嘅變化、專欄嘅特色、繪畫嘅技法，當然近年佢變化最大就係喺處理場面設計、調度方面。譬如利用兩個不同場景所發生嘅事交錯表現，這種在電影學上的對CUT手法，一方面可以加快節奏感，令劇情更緊凑，另一方面亦可不停在期間加插驚嚇性，加强吸引力。
其後馬仔越操越FIT，新鮮表現手法層出不窮，例如主觀鏡交待主角嘅行爲，讀者一直只睇到旁人嘅反應，以别人嘅反應再感覺主筆嘅訊息；又例如利用某一人嘅心聲交待正在發生嘅劇性，以上種種，喺香港漫畫界來說，無疑是一些小小的領導性突破。
排第一，第一，呢兩個字不知令多少人嘔盡心血，大家同樣攞五蚊雞買本漫畫書，但係馬仔嘅作品一定要勁、一定要有新意、一定要…，乜都要盡善盡美，你話幾咁陰公呢！
表面上，馬仔好鬼輕鬆，但係我就不時感應到其實佢有DD壓力，故此佢對普羅大眾讀者嘅意見極爲重視。記得嘛，佢講過喺咖啡室碰到低下層嘅讀者，卒之破天荒傾咗半日；有時收到D忠實讀者嘅有建設性批評，又會前諗後諗，睇睇點補不足之處，唉！週不時要應付四方八面而來嘅壓力，將别人嘅意見去蕪存菁，再花心思溶入作品，平時已經咁多野做囉，眞係悲慘啊！
正在起步或正在努力喺主筆大道發奮嘅新秀們，又那會領略到箇中滋味呢？
努力、發奮、有天份、人際關係好、D拍檔質素佳、時運好、時機啱，擁有一切一切，背後還必須加上好鬼多特别條件，所以，能夠成爲成功嘅主筆，確係百份百唔簡單！