「嘻～哈哈哈哈嘿嘿嘿...！」賴桑飛到半空時，舌女便把繩索舔斷了。
「佢條俐有酸性！」奎斯雙拳握緊。
滑到一半連接兩邊的繩子就斷掉，便無法保持水平，滑行的力量隨即失去，繩子瞬間軟下來。
「...」賴桑在那千鈞一髮之間，轉握軟掉的繩子。
並且根據擺力，整個人正準備飛撞到對面大樓的外牆上！閉上眼睛的我，大概可想像到，那衝擊力會有多強，再加上有隻病嘴捉緊住背部，充當住沉重苦累。
即使骨不斷，內臟也傷。
可是，賴桑卻沒有輕易放棄生命......
他在空中準備撞上外牆的短暫空檔中，及時調整了姿勢、扭轉了身體以背部對住外牆，如此一來撞上外牆的人便變成病嘴，為賴桑阻隔了不少的力量！
「呯──！」果不其然，病嘴撞到外牆上。
為免錨鉤會突然鬆掉，我們五人都一同緊握住它。
「加油呀！！！！！！頂住啊...Kid！！！」白魂怒喊。
「啊......」賴桑捉住繩子，試圖一下一下地爬上，可惜都有心無力。
「唔得...實在太重！佢背負住隻病嘴無可能有力氣爬到上嚟......！」奎斯咬緊牙關。
「奎斯...毒辣靈藥......仲有冇！？」我問。
「仲有一瓶...！你想...」
「舌女嘅唾液酸性可以腐蝕病嘴強大嘅黏性......」我及時記起「病獵公會」中，白鯨曾經所撰寫的文章。
「係...！啱！拎住！」雙手捉緊錨鉤的奎斯，說：「喺我腰袋！」
我馬上去拿取靈藥再走到窗口前，低頭對望著表情吃力無望的賴桑，喊：「賴桑...！得一次機會，接住樽靈藥，然後倒落背脊後面！」
「...」咬牙切齒的賴桑，點一點頭。
「接住！」我把靈藥垂直掉落。
幸好剛才賴桑沒有長時間頂門，這使得他擁有比我們更多的力氣。
「啊...！」他伸出一隻手，把我在上方掉落的靈藥捉住了。
「......」然後，他用齒咬開瓶蓋。
「轟隆──！！！」下著驟雨的天空，轟起狂雷。
「啊...！！」賴桑把舌女的強酸倒落到自己背脊後，他必須承受住那刺骨之痛：「呀呀啊啊啊！！！」
但為了活下去，
這也是必須的。
「咕...喲嗤......啄啄！」病嘴的嘴部開始脫離其背脊。
「啊！！！！！！！」賴桑忍受了常人難以忍受之痛。
最終，病嘴被酸性完全腐蝕，失去了黏性的它立即跌落到地下，當場給樓下的欄杆分屍摔死。
見病嘴卸去，痛入骨髓的賴桑立即掉走了靈藥，然後用顫痛的身軀慢慢地沿著繩子爬上來。
他表情除了痛苦之外，還是痛苦。
在快到的關頭，賴桑似乎已經筋疲力盡：「嗄...嗄......啊...！」
「捉實我隻手...捉實...！」我伸出了手，他只需多爬一步就可以捉到。
「我...我唔夠力......爬唔到上嚟...」
「你可以嫁，」我左望右望，拾起了自己的傘子：「捉住個柄勾！」
這麼一來，他就不需再多爬上一步。
「...呀！」賴桑伸出震顫非常的手，捉住了傘子的柄勾。
及後，白魂立即拉住我的腰部，把我們用力地拉進來！在賴桑上到窗前後，王達尼亦馬上把他拉進來。
一片喘氣聲。
我們六人都躺在地板上，喘過不停。
「你哋...確定，我哋...仲有......力氣...去面對後...嘅問題？」王達尼上氣不接下氣地說。
「只要搵到白鯨...就可以......」即使久經訓練的奎斯，情況跟王達尼也一樣。
「賴桑...有冇事...」我轉頭，望住地板貼臉的他。
「...」賴桑看起來，沒什麼氣回應。
「汪！」最精神的只有犬京的狗，分別舔著他們的臉頰。
「哈...哈哈哈哈，乖。」犬京輕撫著他。
當中，體能最好的白魂，很快就站得起身：「我哋......到達目的地喇。」
「病者之都嘅中心......」躺在地上的王達尼，望望左右周圍：「西貢將軍澳政府綜合大樓。」
「依到有幾層？」白魂抬頭出去，問。
「最高十層...」王達尼望望周圍，說：「我諗...依到係五樓左右，民政事務署......」
我們滑進來的地方，是一間類似會議室的房間。
「出去望下先......」奎斯第二個站起，走出去看看。
「我跟你...」我也站起：「可能附近...有啲醫療用品，啱賴桑用。」
「係......我哋啲物資留哂喺對面。」奎斯轉頭，望著留下來的人：「你哋喺到休息下先。」
一開門，是間辦公室。
「辦公室......」奎斯點點頭，說：「即係...會有茶水間，有茶水間即係有急救箱。」
「呢到同坑口其他地方一樣，都係...冇人搜括過。」我見周圍都擺放著有用的物品。
「整到我哋損手爛腳嘅病者之都，邊有人會敢入嚟......」奎斯說。
「嗰邊有茶水間，我去睇下。」
茶水間不大，只有兩、三個身位，不過五臟六腑。上至急救箱，下至零食甜點都有，但街邊的食物最好不要亂撿來食。
「應該夠用。」我只把急救箱帶走。
回去後，便開始幫賴桑治理傷口。
「呢到好奇怪......」回來後，奎斯說起。
「奇怪？」
「我頭先出咗去望一望，好似......」奎斯也不知怎說：「一隻病者都無。」
「暴風雨之前，總係平靜。」白魂正專心地，磨著自己的刀劍。
「咁仲好，快啲完事，搵到個白鯨之後。」王達尼說。
「休息陣先。」我們體力都未回。
休息了片刻，我們也該思考等會的前進路線。
「我哋算係喺中層......」王達尼不忘要抽幾口煙：「一陣向上行定向下行？」
「通常佬大級嘅人物都係喺最上層！」白魂說。回想起來，老賢、不破尚、滿天、董倫、Dr.D等人，都甚少出現在建築物的低層。
「我都咁認為。」我附和。
「咁一陣我哋就向上行。」像半個隊長的奎斯決定。
「汪汪...！汪汪......！！」忽然，犬京的狗Ricky對著窗外狂吠。
「噓......細聲啲。」犬京對牠說。
「汪！」牠還是不停地吠著。
「唔？」犬京似乎都感覺到些不怠，於是走去輕撫Ricky：「噫...你...你哋睇下......！」
走到窗前安撫Ricky的犬京，一副驚訝的樣子，看到了什麼。
我們五人隨即緩緩地站起，走到窗前觀視。
「哇...？！！」剛到窗前的王達尼，也嚇得微微退了一步。
「一片火海......」上來後，幾乎沒有吐言談話的賴桑，也不禁被眼前的畫面震撼到。
熱烈熊熊的火海，正在外面的街道焚燒著。
是一道約莫三、四層樓高的火牆，貼切一點來說，整道猛烈熾熱的火牆，以圓形的方式包圍在政府綜合大樓外，彷彿隔絕著外界的一切。
「肯定唔係人為。」我苦笑。
「咁係自然發生？」白魂傻傻地問。
「係病者所為。」我直白一點去說：「我之前係唔係講過，有個人叫「南愚」嘅特殊病者...見到呢道咁高嘅火牆，我無辦法唔聯想起佢。」
「即係......嗰隻啲血...識得起火嘅肥佬嚟咗！！？」王達尼在翠林村跟他有過一面之緣。
「照睇就係。」
「頂...！」王達尼苦澀地嘆氣，辛酸地掩住眼睛：「有冇咁啱......唉，幾時先可以離開呢個地獄。」
「好快。」奎斯拍拍他的膊。
「咁一陣遇到嗰隻嘢要點搞？」好戰的白魂，把問題放回到敵人身上。
「你哋記住佢嘅特性就得──血液一接觸到空氣就會激燃起火焰。」我向他們講述。
「要用水攻？」白魂又問。
「你當你打機，敵人用火，你用水佢就會受傷？」我不禁要嘲諷一句：「物理傷害，俾直接嘅物理傷害佢就得。」
「即係...我用刀斬佢都可行？」犬京在行程中，是最為努力和認真。
「得，上次我用散彈槍近距離一發，就打到佢半死。」我提醒一下他們：「不過你哋記住...越係傷得佢深，佢表面流出嘅血就越多，情況就會越危險。」
「轟隆──！」
話語剛畢，烏雲密佈的天空就發出沉吟的雷響且閃爍著光藍的閃電，每下響亮的雷暴都坎到人的心底中，使人畏怯。
「Oh...shit！？」王達尼更為不悅，雙手往外一攤：「連個隻雷佬都嚟埋！！？」
「你最好有咁嘅心理準備，始終......呢到係病者之都。」我們要認清這個事實。
「雷佬？」白魂疑惑。
「另一隻識得操控電嘅特殊病者──「北賢」。比起用火嘅南愚，佢更加危險，你一俾佢用高壓電掂到，基本上就唔會有命走得番出嚟。」我說。
「即係，用近攻......肯定唔得...？」剛才經歷過一場煎熬的賴桑，用力竭的聲線，問：「咁遠攻...？」
「近攻嘅話...除非你把武器...係絕緣體。」我不緩不急地一一解答：「遠攻嘅話...佢有電荷離子保護，都好難傷到......」
「照咁聽佢更加難對付......」犬京雙眼已經帶住憂慮。
「六個人打佢哋兩個人，好好合作就得。」這種時候，我們更應堅定。
「係...鳥嘴兄講得無錯，都行到呢一步，無理由放棄。」奎斯把手放在前：「一齊嚟，一齊走。」
有見危險將至，我們沒可能坐以待斃，所以趁早起行，計劃一切。
「你哋身上仲有咩物資......」離開這間會議室前，我詢問一聲。
「少量陷阱設置...」賴桑答。
「手槍同五條煙。」王達尼把大衣袋中的東西，都翻出來了。
「少量箭，同埋狩獵小刀。」奎斯答。
「短刀。」犬京答。
「刀劍！」白魂刻意舉起武器。
「係勉強少少......」我把手，搭在奎斯手背上：「不過最重要，係有佢哋無嘅合作。」
接著，大家都逐一把手搭到中間，然後六個人一氣呵成地壓下！
「如無意外，白鯨就喺最上層。」我們踏出了會議室。
大樓中，有樓梯及電梯連接住內部的上下每一層。
由於採用了落地玻璃式的設計，因此外面的光景一一都在眼內。
天上的響雷，地上的烈火。
像影子遊戲般反射在地上，酷如一隻魅影的怪物。
最讓我們感到意外的是，大樓確實如同奎斯所說，一隻病者也沒有。
彷彿最後一場大戰的來臨，現在的平靜只是讓人收拾心情。
除了震懾人心的雷聲，就只餘下我們的腳步聲和沉重的呼吸聲。
我們透過停電的電梯，一直相安無事地走上到八樓，才開始察覺到異樣。
「點解...」王達尼都留意到。
就是，我們一直重複走著同一的樓層。
「行極都唔完咁......」奎斯也察覺到了：「上唔到第九層。」
「既然係咁...就睇下第八層有咩問題。」我心中，其實有個不確定的答案。
我們走入第八層，根據貼在牆上的指示牌所指，這裡為政府官員的辦公樓，往上的層數也是。
於是，我們在這層尋找著可以繼續前進的路，可惜仍然無功而返。
我們只得空站於八樓的中央大堂，苦苦凝思。
「咁奇怪...無理由永遠上唔到第九層......」王達尼禁不住抽起根煙，思考這問題。
「除非有鬼神，否則無可能發生...」奎斯也認同。
「定係......」我提出可能是天方夜譚的想法：「我哋意識一早俾人侵入咗。」
「意識？」白魂問。
「既然病童...同男病童可以製造出龐大真實嘅幻境出嚟迷惑人心，咁我......唔排除，依家都呢個可能性。」
「但係要做到我哋完全唔察覺嘅情況，真係有可能？」奎斯說。
「我未提出假設之前，我哋可能真係一世都唔會發覺......」我說下去：「但一提出，我哋大腦意識就有個認知喺到，就可能會慢慢瓦解到幻覺...」
「你又喺邊到睇啲咁高深嘅嘢返嚟？」王達尼望向我，問。
「病獵公會入面，有哂白鯨寫嘅文章，病童嘅研究都係其中之一，對付同防備佢哋最重要嘅事......係精神力。」這是為何，我說行動前要做足功課的原因。
有些重要的情報，忽略了，就可能一輩子。
「要有強大嘅精神力......無時無刻認知病童嘅存在，先可以化解佢哋歌聲嘅影響。」賴桑把原句讀出：「我記得白鯨講過，自己最難落手嘅病者......就係病童。」
「仲有，佢文章入面最後一句......」奎斯確信地說：「克服所有陰影同毫無快樂嘅人，先可以真正擺脫病童幻覺影響嘅束縛。」
「不過，我有另一個方法......Ricky。」是我剛才想出的。
「佢？」犬京愣然。
「佢係狗，唔同人腦咁複雜。」我用指尖輕輕點牠的鼻子，說：「而且，佢有比人類靈聞好多嘅鼻。」
「咁都俾你諗到，好嘢...！」王達尼拍掌叫好。
犬京聆聽後，便命令牠：「Ricky！聞下邊到有人嘅氣味。」
說畢，Ricky聽命後，馬上聞著地板，追尋附近的氣味。
「或者...呢樣幫到手。」奎斯從腰包中，取出那條大王鯨魚項鍊：「呢條鍊，係白鯨以前經常帶。」
「Ricky！聞下。」犬京取過項鍊，放在Ricky的鼻前。
「汪！」Ricky嗅了數下，便隨即吠叫。
「有發現！？」犬京揚起嘴角。
「汪汪！！」Ricky激動地搖著尾巴。
「帶我哋去！」犬京拍拍牠的頭。
「汪！」隨即，Ricky就開始帶路。
「哇......真係好彩，如果你過滑扣嗰到無抱埋隻狗嚟，呢關真係唔知點過。」王達尼跟在後面，說。
「呢啲就係所謂嘅天生我材必有用。」白魂說出一句不關事的句子。
「還返俾你。」犬京把項鍊交還奎斯。
「好...」奎斯接過，放回入腰包：「原本我帶過嚟......係想見番白鯨之後，親手拎番俾佢戴住，我都估唔到咁有用。」
Ricky領著我們走過很多的轉角，渡過很多長長的走廊，有些小路更是我們意想不到的。
終於，Ricky在一個毫不起眼的雜物房停下，並對門吠著。
犬京把門打開後，就發現了通往第九層的小梯：「係呢到......真正上第九層嘅樓梯。」
「Good boy！」犬京拍拍牠的頭。
我們全部人徐徐上到九樓，但事情尚未完結，Ricky繼續周圍嗅著，似乎九樓不是一個終點。
「睇怕應該喺十樓......」王達尼抬頭，望望窗外。
「汪！」數分鐘後，Ricky的狗又再吠叫。
不同的是，這次不是對犬京吠叫，而是我們剛才樓梯的入口。
「汪汪！」牠不斷地叫著，尾巴都豎立了。
「Ricky...？」犬京眉目鎖起來：「小心...可能有敵人。」
「咩意思？」白魂不解。
「Ricky豎起尾巴，係緊張、有敵人嘅意思，我已經訓練到佢，可以聞出病者嘅氣息。」犬京警戒地舉刀。
「即係...」我集中注意力，凝視住剛才上來九樓的的位置。
「嘻嘻嘻～～哈哈哈！！！」忽地，Ricky對吠的樓梯口，出現了拍掌和笑聲：「真係醒目嘅狗狗啊！嘿哈哈哈。」
南愚，從一側現身了，從樓梯踏上到九樓之中。
「佢就係......」奎斯凝視著他。
「南愚...」賴桑也是頭一次見他。
「咦...？喲嘿嘿，你哋咁清楚～我個名嘅？哈哈哈。」南愚不同往日，原本那腫脹的肚子，如今已經被嘔心地強行縫十多針：「哈哈哈哈！係你啊...唔～上次喺古宅開散彈槍射我？你知唔知我縫得幾辛苦......啲腸、內臟同腎先冇跌哂出嚟，哈哈哈哈哈！」
「果然仲未死......」我盯著他。
「嘻哈哈～！上次唔係有隻死野狗救咗你...我就唔會喺到見到你。」南愚對著Ricky笑呵呵地說：「不過估唔到～原來狗狗都咁有用喎，嘿哈哈哈，識得咁樣破解白鯨嘅障礙，北賢果然冇睇錯人！多謝你哋......帶我哋上嚟嘿嘿！咁當然......嘿嘿嘿，都要係隻訓練有素嘅狗狗，有好多磨練先可以。」
「你咩意思...！咩白鯨嘅障礙！？」奎斯見他提起會長，便憤然地問。
「喲～又唔小心爆響口。」南愚掩住自己笑口常開的嘴巴：「你哋班愚人仲未明～？北賢點會咁好心透露白鯨嘅實際位置你知...呵呵呵，當然有目的去利用你哋。」
「...」
「辛苦你哋，幫我破解咗......永遠都上唔到嘅第九層。」此時，北賢才緩緩地從後而出。
「雷佬都出埋嚟，玩完......」王達尼低聲自語：「但...係佢隻眼......好似有啲問題...？」
北賢雙目，有一道深橫的傷痕。
而且，他上來到現在，都沒有打開過眼睛。
就像南愚之前所說，他的雙目似乎真的全毀了。
「原本諗住喺背後跟蹤你哋，直至去到最高嗰層搵出白鯨，但睇嚟...嗰隻聰明狗發現咗我哋嘅存在。」北賢舉起一隻手，做出準備彈手指的姿勢：「不過冇所謂，我哋已經知道點樣去破解白鯨刻意製造出嚟嘅幻覺，所以除咗嗰隻狗之外......請你哋都，死一死先。」
「滋──」北賢彈了下手指，微弱的電流隨即湧上我們小腿的位置！
使我們下身短暫地麻痺起來，站不住腳，酸軟地跪下來......
下一秒，南愚就用牙齒用力咬破手掌，露出一道滲血的傷口：「嘻嘻～！我鐘意聽人類俾火燒死嘅慘叫聲！！」繼而伸手一揮，意圖把危險的血液揮灑到我們身上。
「仆街！」王達尼望見南愚似曾相識的動作，立即脫下自己的棕色大衣：「條褸好貴啊......頂！」
「嘻！」南愚揮出的剎那，反被一件棕色大衣蓋住了手部。
「蓬～～！！！」火焰燃燒大衣。
在千鈞一髮之間，王達尼把自己的大衣脫下，飛套到南愚惹火的手掌上！
「噓──」奎斯連發兩箭，分別到南愚和北賢的臉部。
北賢利用電荷離子保護自己，箭還未觸碰到他，已經遭彈走損毀。沒有保護能力的南愚，則需要用另一隻手掌保護臉頰，但這讓他另一隻手也受傷流血而起火了。
失去視力的北賢伸出了手，有絲微細的電流從他掌心而出，隨後問：「南愚...隻狗喺邊？」
「你兩點方向！」南愚又想向我們揮灑血液。
但這時的我們，腿部已經回復知覺，可以躲開他的血濺攻擊了。
「Ricky！跑啊！」犬京大喊。
牠隨即往樓下奔逃，步伐如同閃電的北賢亦緊隨其後。南愚試圖阻止我們，不過白魂上前不消兩、三下刀勢，已將他之前縫好的大肚皮再次斬開！血肉模糊的內臟再次半掛著。
「啊啊啊啊啊呀呀呀呀呀呀呀！！！！！！！！！！」這使南愚感覺到強烈的痛楚，並且整塊大脹的肚皮都燃燒起來。
我亦把握機會，用雨傘往他腹中一刺！再刺！！三刺！！！
「啊...！！！！」南愚暴瞪雙目，狠狠地怒視著我：「嗚...你！啊嗄...嘎......啊！！！」
另一邊，賴桑和奎斯，則去幫忙犬京制止住北賢對Ricky的追擊。
因為他們知道Ricky一旦落入南北二人手中，肯定會不好的事情發生，而且我們亦需要牠來協助完成之後的路。
「嗄...唔會......唔會放過你哋！！！！！！！！」南愚揮灑血液到王達尼那邊。