在鎚子將要落下的瞬間，奎斯及時從後捉住了他，拯救了我。
然而，這「現實」的場景並沒有維持好長。
聽覺逐漸回復的我，開始見到周遭的事物再次變化，變化成剛才的珠寶、兒童牆紙、玩具，還有白衣信徒。
「黑鴉......起身啊...走啊！」奎斯扣住了他的雙臂。
回神的我，馬上站起，對眼前的白衣人腹部連打數拳：「你係咪王達尼！！？」
「你班畜生點解會咁勁......！」白衣男掙扎成功，從奎斯的扣擊中脫出：「嗄...啊...嗄......」
「奎斯，我哋已經喺幻覺之中......」我按住痛得非常的後腦。
「但係明明啱啱已經戴咗耳塞...」奎斯說。
「睇怕...並唔係一般嘅病者，你試下去搵方法破壞呢到嘅聲音。」我交代。
「...咩意思？」奎斯望住喘住氣的白衣男。
「呢到...應該有無形嘅聲...音令到我哋睇唔到...真實，」我試作猜想，說：「可能係更強大...嘅病童？我唔清楚......總之唯一方法，就係奪走或者干擾呢到嘅...聲音。」
「明...明白，咁眼前條友......」
「佢係王達尼...我都幾乎可以肯定，只係幻覺令到我哋見佢係第二個樣。」我說出另一個猜想：「恐怕......對佢嚟講，我哋依家嘅樣...都只係一隻病者，佢先會咁出盡全力要殺死我哋...佢人再衰，都唔會亂咁超過殺人嘅界線......」
「去！」我拍拍奎斯的背。
現在，房內只餘下我和王達尼。
儘管眼前的他，已經變成第二種模樣。
王達尼不屬於快速地進攻的速度型，他比較傾向智力型那一種......儘管我不想承認這個事實。
不過一間小房四面牆，任你腦力多好也沒用。
所以把他制服住就好了，直至奎斯破壞到這裡的幻覺。
「唔好阻住我返屋企啊......」他咬一咬牙，又再舉起鎚子衝了向我。
我用右肘頂他肺部一下，就足以使他疼痛得鬆下手上的鎚子落地，再一手拉住他的腕部把他壓在地。
只能說他的格鬥術太弱了，只要對上稍為有學過搏擊技或防身術的人，就滿身破綻。幸虧，自己以前在學堂就上過不少的格鬥堂，在這個時代叫做派得上用場。
「我居然要輸俾呢隻大眼......」他語帶悔恨與侮辱地說：「點解...呢隻大眼打架咁勁...嗄......我只可以等死...」
「我唔係大眼...」壓住他的我，說。
「又發出啲死人笑聲......」王達尼大喊：「要殺就快！我認我係貪心...我抵死......居然為咗袋寶石...嗄...」
看來我在他面前說什麼話，都會自動變成了病者的笑聲，難怪他聽不懂我的說話。
不一會，有個人推門而進......是犬京？
他拿著喇叭在我耳邊，讓身邊的狗對住咆哮：「汪！汪汪汪汪汪！！！」聲如洪鐘。
「呀......」我和王達尼都痛苦地按住耳朵，但周遭的景物都可以變化。
逐漸地......
王達尼，都由我眼前的白衣男模樣，轉變回原本不修邊幅的他。
「啊...？」他愣然地望望周圍，再望望背後一直壓住他的我：「係...係你...？！」
「你終於知啦咩...你剛才，差啲殺錯良民。」我站起身，說。
「點...點解會咁！？」王達尼毫不清楚周圍的情況：「啱啱啲寶石呢！？點解...間房變到荒廢咁嘅......」
「病童，」前來救援的犬京，似乎回復了點力氣，更找了個喇叭來讓自己的狗一直對著吠：「係男病童。」
「你已經冇事...？」望住傷痕累累的他，我問：「點解你會上咗嚟？奎斯呢......」
「唔好睇少我先得......」滿身是傷的犬京，慢慢回答：「頭先我出到走廊...遇到佢，聽完佢講嘅情況...都大概知道係男病童...先做得出嘅影響，所以我叫佢去啱啱個教堂拉部琴出嚟，我就去教堂後台拎住喇叭嚟救你哋先...。」
「呢條友......」不知情的王達尼，充滿住警惕。
「我哋敵人得番一個。」我伸手制止住王達尼。
「...」犬京與王達尼對望了一眼。
「可以講未......」我望住犬京，問：「個男病童，係咩一回事。」
「詳情...我唔太清楚...只係隱約知道，佢平日可以任意出入...所有地方，德蘭教主...同以前另一位光頭教主...都總係叫我哋要無視佢嘅存在。」犬京交代：「可能......係因為，男病童有住佢哋都掌控唔到嘅力量......」
「...你見過？」王達尼問。
「曾經...見過，佢有能力唆使教徒自相殘殺，同製造出極大嘅聲響，令迫癲人類......」犬京回想起過去：「只要我哋組織似乎滿足唔到佢嘅要求...佢就會對我哋進行呢種懲罰......冇一個人想受呢種痛苦，所以我哋當初都跟隨教主嘅定義，視佢為「神之子」，上帝嘅仔。」
「但你似乎...終於都醒悟。」王達尼留意到犬京有所改變。
「頭先好多病童集體哭泣嗰陣......」犬京眼中掠過一絲悔疚，說：「我諗起好多...痛苦嘅回憶...罪惡感一直喺我心入面滋生住，好彩......我嘅同伴一直陪伴住我。」
說畢，他便望過去自己的狗那一邊。
「仲有我嘅拳頭，將你打番清醒。」我說。
「係～原本仲好傻好癲...想帶住呢到所有人一齊做個了結，但一比你打到攰...我就攰到呢個諗頭都打消咗...」犬京又掠過一絲笑意，說：「繼續生存......或者會好痛苦，但有你哋嘅話...應該會有趣得多。」
「冇人天生就係孤獨，」我對犬京他說：「就算係孤獨，你都會搵到同你一樣同你係孤獨嘅朋友。」
「唉～」王達尼苦笑，說：「你又講埋呢啲說話。」
「唔？咩說話...」我說。
「嘿，冇嘢。」他不明所以地笑了笑，說：「或者，呢點就係你嘅吸引之處？總係要有啲人，對世界抱有住希望。」
「......」我不明，王達尼在暗示什麼。
「呢家要搵出男病童？」我放回在重點上。
「仲有第二個選擇，就係走。」我也預料到王達尼會提出類似的意見：「頭先我一直想走，只係太多障礙，諗住入嚟避一避等夜晚再蒲頭行動。」
「但你點會上咗嚟呢層？」我問。
「逼不得已。」王達尼嘆了口氣：「頭先入嚟有啲教徒發現咗我，就一直追，我就一直跑到最高呢層，跑好入個陣就發現佢哋冇再追嚟...然後我見到一幅類似地圖嘅畫，發現畫住鎖匙嘅地方離我好近，就去拎咗一條鎖匙。再跟住去到地圖有寶藏嘅位置，就打開咗呢道門。呢個時候我見到有幾隻大眼出現想殺我咁...我就喺走廊殺咗幾隻......最後跑到入嚟呢到，打算入夜再行動。」
「原來係咁......」我轉問犬京：「你所講嘅男病童，佢有冇咩特點。」
「雖然...平時都無視...佢嘅存在，不過...都可以從教主以往嘅貢品隱約得知，佢鐘意嘅嘢有一樣......就係閃亮嘅寶石，之於鐘意做...嘅事...就係搵人陪佢玩遊戲......但係同佢玩遊戲輸咗嘅人類...我從來未見過佢哋有命出得番嚟...。」犬京說得算是長盡。
「有冇弱點。」
「弱點...我唔清楚，只係知道，要接近佢都好難...」
「我知。」我回憶起蜜蜂般的嗡嗡聲：「睇嚟......佢係一個好難搞嘅細路。」
「要搵出男病童...我諗第一個方法係喺呢層，搵出佢嘅屋企。」我再說。
「屋企？」王達枇問。
「既然男病童有得收貢品，就應該有個可以收埋貢品嘅地方，好似寶石鑽石呢啲明明無任何用途...但係價值又好高嘅石頭，除咗放喺「屋企」擺下之外，我都唔知可以放喺邊。」我說出自己的想法。
根據奎斯所說，病童是擁有６至１２歲的兒童智商，說明總會有「家」的概念吧。