回去寶琳倖存區後，我先安置好雨川到「寶琳柒拾」，付點小錢讓老闆暫時照顧他一下，然後才到哈姆雷特跟王達尼會合。
「拎得本小說喇嘛？」王達尼在門外等了我一陣子。
「係。」我徑自進去，說：「你準備去聯絡嗰個..貴華。」
「好，皇政府總部外面等～」離開前，王達尼無奈地說：「應該要加價，為咗本嘢幾乎搵命搏～」
我進去見瓦安後，交代了送信的任務已經完成。
瓦安他滿意地點點頭，還豪邁地大笑著，問：「有冇順便去飲佢哋啲特產血酒啊，哈哈哈哈哈～！！嚟，你嘅報酬。」他從上鎖的抽屜中，取出一個公文袋。
回憶起當時永林樓的情況，我完全笑不出來。
「呢本？」我從他手上接過用文件袋包住的一本書。
「我瓦安從來唔會虧待任何幫得手嘅人～」瓦安徐徐地大笑，說：「因為一個成功嘅商家啊，身邊總要有一、兩個不擇手段嘅助手去幫忙。」
「你身邊應該唔少呢種人..」我收下文件袋之後，就準備離去：「呢本書.我就收咗佢，多謝。」
「呢種助手，我從來唔會嫌多～」瓦安的笑，就像藏住把刀。
以後沒事，我都應該不會再來。
在書得手後，我去到皇政府總部前等待一會，過不多久，王達尼便帶同貴華而來了。
「一手交錢，一手交貨。」我對貴華說。
「你哋居然真係搵到..」貴華有點訝異。
「為咗佢.我哋差啲死，廢話唔好講～俾錢俾錢！」王達尼很著急。
「好啦...」貴華付了尾數後，我把公文袋給他了。
付錢後，他即場就把公文袋打開，看看裡頭的小說：「點...點解入面啲字，好似唔係個回事嚟嘅......」貴華略略一看，已感不妥。
「唔？」
貴華把《哈姆雷特》的內頁翻開，展示給我們看：「你哋睇......！」
頁面中盡是阿拉伯文等字，完全看不懂意思。
「呢本明明係《哈姆雷特》......」我望一望那封面。
王達尼很快就意識到問題，低聲在我耳邊，說：「我哋...肯定中咗瓦安計。」
「你意思係......」
「應該一早諗到，佢點會做犯法嘢咁蠢...點會敢真係收埋啲禁書，肯定淨係用《哈姆雷特》本書嘅外套，內頁就完全係兩回事嘅嘢......」王達尼暗暗咬牙：「失策...」
「我哋應該都奈佢唔何......」我想到後續：「唔通告俾皇政府聽，入面內容同真正嘅《哈姆雷特》唔一樣...條友真係，奸。」
「喂......」貴華不安地望住手上的小說：「點啊...我到底睇緊啲咩啊......」
「貴華，」王達尼快速地整理思緒，解釋：「呢本係阿拉伯譯文版本。」
「咩話？！」貴華訝異地叫了一聲。
「英文係人都識睇，咁太危險。」王達尼揚起嘴角，說：「如果係阿拉伯文版本，就唔係嗰個都識睇，咁你都可以減低被捕嘅風險。」
「我...我點睇得明啊！」感覺貴華好想把這本小說掉走。
「用你嘅方法，不過方法我都唔係話冇，阿拉伯文我都識睇少少......」王達尼根本已經當貴華是傻子看待了：「你有咩唔明可以再嚟請教我，一隻生字收費一艾幣。」
「吓啊...」貴華失落地低頭。
「唔好咁失望！下次有好嘢，再益你！」王達尼拍拍他的膊：「到時打七折。」
「仲...仲益啊？唔洗啦...嗚嗚......」貴華握住小說拔腳跑走。
「呢家啲貴族真係...」王達尼目住他的背影離去。
「我哋算唔算又呃咗佢一次。」我說。
「冇計，我哋都中咗瓦安計...」
「咁就當我哋呢次俾番瓦安呃，一人一次，打和。」我點頭。
「唔，」王達尼點頭：「唯有係咁。」
「之後，你會繼續幫手？」王達尼問我去向如何，說：「感覺同你一齊，時間好似變得長咗又危險咗。」
「遲啲再決定，啱啱知道咗咁多有用嘅情報，我冇辦法當聽唔到。」我搖頭。
「睇嚟亡命生涯，先比較適合你。」王達尼點燃起一根煙，說：「你注定係食呢行飯。」
「我聽日會去病獵公會一敞。」
「你有事再去「詭區」搵我，我班團友都差唔多返嚟，我要去點一點數。」王達尼說。
就此，我暫時跟王達尼分別。
翌日，就動身前往到病獵公會中，去把昨晚在南愚北賢身上聽到的情報，告知給他們。
聖堂一如既和地神聖、莊靜，我把關於區內孩童都被病翼抓走去坑口的「希望塔」中，及白鯨還未死去的消息告知了聖女Nina。
「呢啲消息...你係點得嚟？」她問。
「調查。」
「你又會...」
「總之，就係可靠嘅情報，我好難解釋。」
「如果係咁，就更加要做啲嘢，不過你都應該好清楚坑口嘅情況？」
「略略聽講過......」
「如果呢到係人類住嘅倖存區，咁嗰到就係病者住嘅倖存區。」Nina望住我，問：「先生，可以點叫你？」
「就叫我...黑鴉吧。」沿用黑鼠商團給我的名字就好。
「喀──」聖堂的大門，驀地打開了。
把門推開的人，是個戴住西方羽毛寬帽子、穿住一身貴族洋服似的人。但該裝扮沒為他帶來重慢、盛氣的感覺，反而充滿輕快及優雅的運動感。
「Nina，南區個邊，大眼、病嘴，都已經清除哂。」他說話很多停頓位。
那人盯了一盯我，帶點欣賞的目光，說：「中世紀鳥嘴醫生......睇嚟有志同道合。」對方打扮太中性了，我其實猜不著他的性別。
「你係？」我問。
「我叫賴桑。」
「佢叫黑鴉，頭先為我哋提供咗一啲情報。」Nina說。
我說：「你志同道合嘅意思係，你一眼已經睇得出......」我曾經狩獵過病獵嗎。
「我一眼已經睇得出，你對衣服都幾講求品味。」賴桑淺淡地微笑，說：「你睇唔睇得出我呢身嘅裝扮？」
「唔太清楚。」我搖頭。
賴桑說下去：「係十八世紀洛可可時代嘅洋服裝扮，你出街個陣應該成日俾人望？」
「嗯。」我必須承認這件事實。
「哈哈哈，同我差唔多。」所以，你到底是男還是女。
「你係呢到嘅......」我直接問出重點：「病獵？」
「嗯，你嚟係想委託我哋咩事？」賴桑問。
Nina先把所有事情告訴給賴桑知。
「你意思係...你知道班細路依家喺坑口？」賴桑猶豫地說：「而且，白鯨仲未......」
「係，就係咁。」珍貴到不行的情報。
「但就算係咁......我哋應該，都幫唔到手。」賴桑帶住遺憾地說。
「你哋冇實力入去？」
「完全冇。」賴桑無辦法的望地：「就算有，咁少人都一定有入冇出，更何況我唔知你講嘅嘢，到底係真定假。」
「我明白...」
「但我好奇，你點解會咁清楚。」
「你就當......係一個預言家同我講。」
「唔好意思，我哋幫唔到手。」
「唔緊要。」
我明白他們的立場，在沒有證據的情況下，是沒可能相信一個素未謀面的人。
有時候人生便是如此，儘管明瞭一切，也有著無法相助的無奈。
在聖堂大門前的我，望望不遠的倖存區，暗暗嘆氣便徑自回去。回去之後，我打算先去找王達尼繼續為他當些差事，無論我日後要生活還是組織軍隊外出，也得用到錢吧。
友情這東西，有時候也不是太靠譜。
殊不知，我在中午到達那個一整日都陰森恐寒的「詭區」後，王達尼好像遇到些小狀況，讓他苦惱不己地抽煙、沉思，滿是憂鬱。
「喂，琴日貴華個筆錢你未分俾我。」我入去他的倉庫，順便問。
「嗯...月尾結算嗰陣再俾你......」頭一次，見到如此苦惱的王達尼。
「出咗咩麻煩。」我直接問。
經常待在倉庫的助手寶拉，代他答：「今朝收到消息，我哋商團喺出面有成員遇襲。」
「倖存區外面？」
寶拉點頭：「係，實際情況未清楚。」
「出發去將軍澳村嘅商團小隊，受到襲擊......」頹然地王達尼，緩緩地說：「我啲貨，通通都冇哂。」
「咩貨嚟。」我就像個警探，循例地問。
「橡木、原本、加工合板、可用角木同埋一堆非法寶石。」寶拉答。
「總之就係關於木材同石頭嘅嘢？」我總括一下。
「我哋運過去嗰啲係皇家寶石商嚟，嗰個倖存區啲人幾鐘意呢啲識發光嘅石頭。」寶拉跟我解說：「而我哋寶林倖存區經常要做好多大基建～所以木材對我哋反而好重要，可以喺到高價出售。」
「明白，總之就係有損失？」
「唔可以俾我啲貨白白咁損失......」王達尼掉了指間的煙到地，喝口威士忌，說：「去睇下係邊個搶咗我批貨...」
「咁你哋線報來源係邊個？」
「一個木匠，佢有時會嚟寶琳倖存區依到。」
「咁你想點？」
「做你最鐘意嘅嘢......」王達尼又隨手把喝光的威士忌扔到地上，任由它跌碎：「出去，調查。」
「一波未平一波又起......」我淺淺一笑。
「係一般貨都可以無所謂，由佢跌。但我今次呢批皇家寶石，係珍貴......價值好高。」王達尼的目光頭一次銳利得想殺人：「所以一定要去搵番。」
王達尼心意已決，為了尋回自己的貨物，已經做好死的覺悟。
路上走著時，我問他那些皇家寶石是如何得來的？他居然答我，都是自己用勞力、汗水與智慧從皇室人員身上偷來的，有血有汗。
或許我們都經歷過諸多的苦劫，我倆走在路上都沒有太過畏懼的心情，至少......病者現在對我來說並不是對付不到的。
「將軍澳村...我印象中，嗰到係一排村屋。」我說。
「係～嗰到近山，所以專出產木材。」王達尼說。
以前要行一條十分鐘的小路，會覺得很快。現在每行一步都可能是危險，就變得很慢長，因為精神都已經集中在當下之間。
我們在寶康路一直往北行，就能到達王達尼所說的倖存區。
一路上，其實我們也注意到周邊病者的活動。
這一區，大耳和大眼都異常地多，但都沒有太大殺傷力，就像一隻初生的野狗般，只敢躲在草叢的樹木後，偷偷觀察著我和王達尼。
只要稍為有跟蹤之態，我們就會加快腳步。
這個小型的倖存區，用木板密密的圍封住。
住在山林附近理應聽到的，是蟬的鳴聲。
但在此等偏僻之地，就只有病者重返又單一的笑聲，裡面的倖存者跟我們說，那些病者就像向蟬學習一樣，初來之時把蟬泥土草叢中的蟬都挖出來，吃光光。
「嘻...嘻...嘻......嘻...嘻...」如今，它們取代了蟬的地位。
病者的笑聲成為了這個倖存區長期的耳音，酷似大自然發出的聲音般，那樣自然，不讓住在這裡的倖存者感到驚訝。
但初到之人，肯定會覺得這種感覺好難受。
所以，他們都製造了一雙的軟木耳塞給人使用，隔絕病者無止盡的笑聲。
「嚟，戴咗佢先。」看門的守衛，只是拿著很簡單的木錘子作武器：「你哋應該唔習慣。王達尼先生，今次嚟做咩......又係經商？」
「算係。」王達尼答。
「請入。」守衛讓我們輕易進去。
周圍雖有樹木圍繞住，是個美色天景......可就不能聽到大自然的聲音。
算是缺乏美吧。
「真係貼心......」我望住掌心中的軟木耳塞，說：「居然特登整出嚟。」
還記得以前要對付病童的那一次，沒有耳塞對我來說，簡直是夜長的惡夢......幻覺頻出不停。
「呢到啲人係幾友善，」王達尼深深吸口空氣，說：「可能住得越遠市區嘅，快樂指數都越高。」
「你有冇頭緒？」我說回此行的重點：「咩人襲擊。」
「人類...就唔太可能，我黑鼠商團嘅成員好歹都有傍身武器，病者都有可能。」王達尼在眾多村屋之中，向一間較為開明的進去：「嗰位木匠老師傅，應該返咗嚟。」
王達尼入的村屋，裡頭都用著木製的傢俱，一陣自然的木材味能很容易聞到，
「黑鼠？你嚟咗啊。」那位木匠，是個老人。
「你今日嚟寶琳個陣，都講咗我聽......我商團俾人攻擊嘅事，我仲邊有理由唔嚟。」王達尼一手插腰，問：「喺邊？」
「你出倖存區之後一直向右行條馬路就見到！嗰到有四件屍，應該係你哋黑鼠商團嘅人！趁竊屍賊未嚟收屍之前去睇睇吧！」老木匠說。
「唔該你。」王達尼點頭謝過，便繼續前去。
我們照住老木匠的方向去走，果然在倖存區外......發現了四具死去的屍體。
地上有貨品被凌亂的掏找過，散滿在一地上，現場看起來很混亂。
「......」王達尼深凝著這一切，才慢步走過去。
原本我以為他蹲下來，是查看還餘下的貨品。
竟不知...他蹲下來，是為了看自己死去的同伴。
站在其背後的我，不懂說什麼安慰的話，只好找別點的話子：「佢哋身上冇乜表面傷痕......」
「冇錯...」王達尼良久才答：「不過...肯定死於非命。」
我走上前一點，一同查看：「有明顯骨斷嘅痕跡......」四件屍體也有。
其中一個，整條骨更從體內刺穿出來。
「應該係好大力嘅人，或者舞者造成。」我說出簡單的結論：「不過我較為相信係後者。」
「舞者......？」
「嗯，一種要依靠有節奏嘅音樂先可以快速郁動到嘅病者，佢哋大腿都強大有力。」我望向山林那邊，說：「啲病者密集嘅笑聲，對佢哋嚟講應該就係最好嘅節奏感。」
「不過...嗰寶石袋唔見咗，證明有人拎走咗。」王達尼看了地上一遍。
「會唔會就係嗰個木匠。」
「點解咁講？佢主動講俾我聽呢件事......」
「冇～我嘅直覺。」發死人財，良心不安的人有很多吧。
疑於安全問題，我跟王達尼不便久留在外面，很快就回到將軍澳村倖存區裡頭。
「要直接問下嗰個老伯？」我說。
「真係要，我同嗰個老闆幾熟......？我都幾多貨喺佢到入。」
我倆站在原地，想了一會。
我再提出：「一係咁，你幫你睇。」
「點幫？」
「你引開佢注意。」