白魂經過一星期專心的休養後，受傷的腳總算能正常地行走，但要飛快地狂奔現階段還未做得到。
而我，亦在這星期計劃好接下來的一切行動。
引導病者平權組織進攻不良人，預計他們會落得兩敗俱傷。
到時候，我再給予致命的一擊。
「鳥嘴兄，我已經準備好。」白魂如期地，在我面前出現。
「嗯，一陣可以出發。」我攜帶了班尼的畫作。
「好...！男子漢，準備做驚天動地嘅大事情！」白魂激昂地說。
也許，我相信白魂的原因...除了他是不良人之中，一個擁有保護同伴之心的人。更是一個不折不扣，十分衝動的蠢材，這種跟銘凱那種深入的城府是兩個世界。
準備好出發的物品後，我跟白魂就準備踏上旅程。
計劃總是完美，因為都是自己設計。
但不明的因素，更多。
我相信這次路途都會一樣。
在我和白魂步出操場之際，幾個不良人正搬運著些死屍出來，而這些死去的人，都是我認得的......是大本營的俘擄。
「死得真係爽快......」、「留俾我哋玩下都唔得～銘凱真係。」、「悶啦悶啦，呢幾個月都會好悶喇！」
「白魂！一大早去邊啊？」搬屍的不良人問。
「咁你哋又做咩一大早咁精神喺到搬屍？」白魂反問。
「唉～銘凱佢殺哂啲俘虜啊，死淨兩件。」
「咩...咩話！？點解咁做？」白魂疑惑。
「點知佢～佢話唔想成日夜媽媽聽到啲慘叫聲喎，咪索性殺到淨番兩個細路。」
「咁無陰公...」白魂說。
「算爽快啦，銘凱逐個幫佢哋放血，咁嘅死法一啲折磨性都冇～真係悶死。」不良人搖一搖頭：「唔講咁多啦！我哋快手搬完屍返嚟食嘢。」
然後，我們就望住他們的背影離去。
「死淨兩個細路～都算佢有良心。」白魂跟我步出大閘。
「大人同細路都差唔多...」對我而言，死了就死了。
依然地，每天都強風呼呼，天氣都好像變得不太正常。
我好久再沒見過那炎熱的夏天，走在草叢旁充滿蟬聲的日子了。
「我哋穿過個城市公園，再經過一條行人隧道同小直路就到。」白魂手指前方。
「我知。」我瞧一眼白魂的刀，問：「你嘅刀法有冇生疏到？」
「當然冇...！」白魂淺淺一笑，說：「我以前教刀，呢把刀嘅靈魂幾乎已經融入我體內。」
「刀法終於大派用場，開心？」
「係有啲開心...不過，每一下都係搵命搏。」白魂認真地說：「只要稍為一判斷錯誤，死嘅就係自己，同以前練劍唔同。」
之後的路上，我們沒多說了。
始終，要警戒一下周圍的狀況。
「比起以前......真係少咗好多病者。」走到城市公園，白魂感嘆地說。
「以前真係好多？」對於一整年留在家中的我來說，完全不清楚。
「係～基本上行十幾步，就會遇到一隻。」
我們的目標地點很近，基本上三十分鐘都去到了位於坑口的聖安得肋堂。
白魂跟我最先是觀察周圍的狀況，免得被人算計或有什麼陷阱。
「睇嚟無乜異樣。」躲在草叢中的白魂，他眼觀四方。
但做人，要像我眼觀八方才行，這才留意到異樣：「唔好去住...見唔見到聖安得肋堂對面公園，個到企住咗個男人。」
那個男人跟我們一樣，疑神疑鬼地環看周圍，又不時凝視聖安得助堂內裡，表情看上去又無助又擔心。
「佢可能係平權組織成員......！」白魂亮出長刀。
「唔似...從佢嘅表情、衣著，都唔似個種人。」我盡可能分析。
「咁...咁點！？殺定唔殺，得呢個兩選擇。」白魂讓我下決定。
「去直接問佢比較好。」我說。
「吓？好大風險喎...如果佢真係病者平權組織班人。」
「你最多一刀斬落佢，斷估附近唔會有伏兵。」我們都觀視過了，附近應該沒有其餘的人。
「直接出去斬佢個頭落嚟，最爽快直接！」白魂眉目緊鎖。
「一係咁，我出去先，去打探佢係咩人。」我對白魂說：「你繼續匿埋。」
白魂豪氣地點頭：「唯有係咁！」
於是，我只好孤身一個出現到那個人面前，並說：「你好。」
「你...你係咩人！！」他比我還要緊張。
我已經故作鎮定了......
「你係病者平權組織嘅人？」我直接問。
「我...」我眼球焦點不自覺地往右上方望，答：「係。」
這......是說謊的表現。
「真係？」我再問一次。
「係啊...」他不敢直視我。
「你真係病者平權組織嘅人？」我再三問一次。
「都話係！！」經我多次提問，他顯得有點怒氣。
說謊的第二個表現，被問幾次就勃然大怒。
這些在警察學堂學回來的基本盤問技巧，比起不良人那些嚴酷的拷問有用得多吧。
「你，你又係邊個...」他也在警戒我。
我冷笑幾聲：「你扮得都幾似...你認為，身為組織成員之一嘅我，會認唔出組織有咩人？」
其實我這一句，是試探他罷了。
基本上我可以肯定，他不是病者平權組織的人，他在說謊。
「你...你真係病者平權組織嘅人！？」他眼球漸漸轉大，倏地上前想要抓住我的衣領。
我立即向右踏出一步，避開抓擊，再握住傘子的前端以勾柄弄跌衝來的他！
「啊...！」他被我弄摔一跤。
「唔好亂郁...」在他想起身之前，我把傘子前端的刺針對住他的頸喉前。
「你...你想點啊......」他知道吃虧了，便不禁反抗。
「應該係我問你，你到底係乜人。」我望住年近三十，衣著得體的他。
「我...我係......」他額上冒水汗水，吐出真相：「寶琳倖存區嘅人...」
「喔...寶琳倖存區？你出現喺到做咩...你應該好清楚，呢到係邊個地頭。」這點，我沒有想到。
「你...你哋好交番公主出嚟......」他雖然畏怯，但也依然說著。
「公主？」我問。
「寶琳王國嘅公主...！」
「你嘅公主係邊位。」
「你...扮緊嘢？你哋病者平權組織成員俾寶琳倖存區打壓之後......就擄走咗我哋公主...嚟咗呢到，你哋嘅新地盤......唔好扮嘢...我淨係想要番公主。」他顫抖地說。
「你叫咩名。」我問。
「我叫...星宇。」
「企起身吧，星宇。」我把傘子從他頸上移開。
「...吓？！」他愕然地張嘴。
「我根本唔係病者平權組織嘅人，剛才只係測試你。」我低沉一笑：「做戲就做全套，做到一半就放棄，好容易掉失性命。」
「你......」儘管他不明所以，但也先站起來：「你係...」
「我叫鳥嘴。」反正大家都這樣稱呼我了。
「咁你到底係......」
「我係大本營嘅倖存者。」我沒可能答是不良人吧，只會讓對方更加害怕我。
「大本營...好似有聽過下...」星宇點頭，說：「咁...你點解會出現喺到......」
「我嚟加入組織。」
「病...病者平權組織！？你要加入......」星宇顯得有點驚訝。
「嗯。」我點頭。
「點解啊？佢哋唔係咩好人嚟...」星宇說。
「頭先你話佢哋綁架咗你哋公主，到底係咩一回事。」
「就係佢哋...捉走咗寶琳倖存區嘅公主！」星宇又焦慮起來：「佢係國王個女...」
「又國王、又公主，你解釋下係咩事。」
「我哋寶琳倖存區統治係行帝制，咁你明未？」星宇說。
「原來係咁...」趁亂世自立為皇，到底什麼人才會有這種念頭。
「既然你唔係組織成員，跟我同你講咁多都冇用。」說畢，我就轉身離開公園。
「呢個組織...唔好入啊！」星宇望住我的背影，提醒我一句。
我不入，怎能摧毀不良人？
確認那個星宇不是病者平權組織成員後，我便走到聖安得肋堂前，敲一敲門：「有冇人？」
大概，連敲數十多下後，這間建築風格開明的教會堂，便有一個穿住整身白衣的人來迎接我：「你好，請問有咩事？」對方，很有禮貌。
沒有錯了，他全身雪白的衣著，就是成員一份子的最好證明。
「請問，係唔係病者平權組織嘅人？」我問。
「嗯，有咩幫到你？」對方是位女士，她的的笑就好像病者的微笑，充滿住詭異。
不知你們去基督徒聚會時，會否有這樣的感覺......
他們的微笑，總是有些怪怪的地方。
「我想加入。」我答。
「加入？我哋加入係需要內部成員之間推薦，未知你係邊位成員推薦？」那女士又問。
就算我在聖安得肋堂外，也能聽到裡面隱約地傳頌著一些唸經般的句子。
「夏當。」我答。
「我哋的確有呢位教徒成員，不過......佢人呢？」
「佢要照顧大廚，所以叫我自己嚟。」沒記錯吧，那被我斬了好多少，又強行塞入大鍋煮熟的病腦名字。
「哦！～大廚，佢係一隻好可愛嘅病腦。」那女士聽到它的消息後，真正地發自內心的微笑起來：「你連佢個名都知道，睇嚟夏當真係有推薦你嚟。」
「當然。」真好，想不到夏當死了，但他的名字還有用處。
「不過加入病者平權組織嘅人，都要擁有對病者一定嘅知識，你可以解答得出？」女士又問。
「當然可以。」我說。
「咁請你入嚟，我叫平子。」她禮貌地請我進去。
終於要來了。
聖安得肋堂內部十分整潔，沒有一點雜亂和血腥殘暴的物品放在這裡，跟外面的世界完全格格不入。
除了會聽到某些房內一些人在唸經，基本上這裡十分寧靜。
「請入嚟呢間房。」平子帶我進入一間光線充足的簡約房間。
裡面有雪白的牆身、雪白的地板、還有穿得雪白的組織成員，除了平子之外還有兩名穿白衣的男性組織成員。
「今日又有新嘅信徒想加入。」平子向兩位男士說明。
「明白。」他們兩個先打量了我，再分別解說：「之後落嚟，我哋會向你出題，如果你錯咗一條，就代表你對病者嘅了解不足......我哋會帶你去深入了解。」
「冇錯，深入了解。」平子微笑。
我答：「明白...」總覺得，這裡比起殺氣重重的不良人據點還要恐怖。
那種恐怖，就像藏於雪白之下的血腥。
一旦揭開，你會發現那底下的雪白都是血肉模糊。
「我哋可以點稱呼你？」平子的語氣不緩不急。
「鳥嘴...就可以。」我說。
「係，咁鳥嘴......第一條題目就開始。」戴眼鏡的斯文男，率先發問：「大鼻係點樣攻擊人類？」
「從鼻孔釋放毒氣。」我答。
「正確，第二條。」這次，由平子發問：「除咗病腦、病爪之外，請列出多一種稀有嘅病者。」
「...」這條我想了想，不過都順利回答：「病童。」
「正確...！上次我都見到，想接近...可惜，佢用歌聲催眠咗我就走甩咗。」眼鏡男給予我姆指讚好，繼續問：「矮靈，即係我哋俗稱嘅竊屍賊，佢哋同病爪嘅關係為？」
這條難道加深許多，對病者沒深入認識的人，根本好少會見過竊屍賊。而且它們跟病爪的關係，大概是......
「竊屍賊會用屍體堆砌一個屍堆，俾病爪入去長眠......病爪就負責保護佢哋？！」我這一條，幾乎是根據經驗而猜的。
他們有點猶豫，但還是說我是對的：「...都叫答啱！」
「最後一條，呢條亦都係證明到......你到底係唔係其他組織派嚟嘅間諜。」平子和眼鏡男深深一笑，說出最後題目：「請講出...我哋病者平權組織，「祈禱」嘅病語。」
「病語...？」我愣住。
「鳥嘴先生，你唔清楚？」平子微笑的弧度更彎了，幾乎像扭曲般：「如果你答唔出，我哋會帶你去深入了解病者......」
望住他們二人的表情，我心臟莫名地加速得更快，可能關乎生死存亡，我腦子比平時運行得更快，突然靈機一觸，想起了夏當在囚牢時經常喃喃地唸的那一句......
「嗄...吧吧嘎！嗨！」