坐在鐵椅上的我，選擇先問一下他們的背景，反正迫供下去只會弄巧反拙。
「你哋喺不良人個陣，生活係點？」
「風氣...同呢到唔一樣...佢哋，只係需要戰士。」娃娃吞吞吐吐地說下去：「同有貢獻嘅人...」
「你兩兄妹嘅身手......肯定唔會係佢哋口中嘅「戰士」，你哋貢獻在於？」我問。
「因為，我同阿哥外貌...都比較吸引，所以我哋一般擔當住......呃人...同情心嘅角色......」娃娃說起，也泛起住淚光。
但我無法看清......
是真還是假。
「我同阿哥會去到...不良人鎖定嘅人類倖存區之中......然後透過滲入，知道入面嘅運作...再同番不良人回報......」娃娃說下去。
「妹...唔好再講......」虛弱的公仔似乎想讓她收口。
「回報完，不良人就進攻入去殺人、放火、搶奪？」我說。
娃娃內疚地點頭。
「點解你哋父母會咁狠心虐打你哋。」我又問。
「佢哋其實...並...唔係我哋親生父母，我同阿哥原本係某個倖存區嘅孤兒，直至有次...不良人進攻入嚟......全區二、三十人，除咗我同阿哥之外...全部都俾佢哋殺死哂...馬德梵兩公婆覺得我哋個樣可愛...就決定收養我哋......」
「你就算知道哂...都無用..我無見個有一個倖存區...係可以抵禦不...良人嘅入侵......大本營最後，都只會俾佢哋....」公仔面青口唇白地苦笑：「妹...你講哂所有嘢俾佢聽......三個月之後，不良人佔領咗呢到...我同你......都會死得好慘...」
「哥，老師可能會幫到我哋......」從娃娃的眼神看來，由我掉下醫療工具那刻她開始相信我了。
「世界上，冇奇蹟...」公仔望住上方那一片空白的天花：「不良人同大本營嘅實力...差距...你好清楚......」
「睇嚟不良人對大本營都摸得好熟...」我心下黯然：「連七樓以下，八樓以上的人，地位同知識分別喺邊都清楚，咁當日少佐用棒球棍毆死嘅......應該就係負責喺七樓以下做諜報工作嘅間諜。」
只是想不到，馬德梵他們一家有能力逃過營中少佐等人的法眼，順利地在八樓上掩人耳目渡過不知多少個月，恐怕大本營中應該有人給予他們相助吧。
「憑你哋一家，無可能喺營入面進行諜報工作，做得咁順利。」我疑問：「仲有人幫你哋？」
「董倫...」公仔吐出這個令我厭惡的名字：「我見父親......同佢成日都有來往。」
「你突然講我聽？」我望住公仔。
「反正...已經俾你發現咗...我同娃娃就係間諜......我好清楚任何間諜嘅下場...」公仔伸出一隻手，擋在娃娃的身前：「我只係要求一件事...就係，你要確保我個妹安全。」
「我唔會傷害你個妹。」我說。
「我知道...」公仔望住我，說：「但第二啲人......唔係咁諗...」
「...」
「我估你之後都會監禁住我哋...我只係想求你......放走我個妹，所有罪名，加喺我身上。」公仔嚴肅地說。
「你有冇罪，係由我定奪。」我站起身，說：「你行出咗盤問室之後，我大可以話你冇罪。」
「......」
「比起跟正常規矩做嘢，」我伸出一隻手，讓公仔握住站起：「我更鐘意用旁門左道去獲取勝利。」
「你想...」公仔不敢握住我的手。
「你仲有得揀，選擇大本營或者不良人。」我對公仔說。
「我...」
「揀一個吧。」我繼續伸住手，隨時讓他握住。
「我都想揀你哋大本營......」公仔十分難決擇，咬住牙：「但你哋最後一定...唔夠不良人鬥......」
「世上總有奇蹟，頭先我俾幾六、七隻病者圍毆都未死，何況我哋一早佈置好所有局。」
「我應該......」公仔望了娃娃一眼，然後選擇握住我的手：「冇任何選擇...。」
我點頭。
「...你信得過我哋？」公仔問。
「信唔過，但我強迫自己去信。」
離開後盤問室後，我對職員解釋只是誤會一場，把公仔與娃娃暫時釋放，並待賴三老師和廢柴三人組回來後，編個籍口只是模擬一下某些突發情況。
人，對於不明的事情，總是不會去深入探究。只要有個人走出來解釋，又合理的話，很大程度就相信對方的話了。
至於這件事，我只跟了老賢一個說。
「事情大概就係咁。」
「不良人......」沒見老賢一段時間，他眼眸內還是隱約地透露出其智慧的深遠：「我已經預咗會有依一日嘅來臨，只係冇諗到...會比想像中快。」
「我哋大本營無論兵力定軍備，都應該唔夠不良人嚟......大本營唯一有嘅優勢就係人多。」我搖頭、苦笑：「可惜嘅係...好多都貪生怕死。」
「貪生怕死，人之常情。」老賢掌背托住下鄂，說：「我哋要做嘅，係要盡可能將傷亡減到最低。」
「重點係...我哋唔清楚對方會用咩方法，攻入嚟。」我又說：「唯一清楚嘅一點係，八樓以上嘅權貴...都幾乎讚成不良人嘅理念，睇怕，要搵一個機會刺殺佢哋嘅核心人物──董倫，嚟殺雞驚猴。」
「八樓上面嘅人...最主流都係跟住董倫嘅意見，仲有另一個同佢勾結嘅不良人間諜......馬德梵。」我認為這個方法可行。
「M，佢應該知...要行刺佢哋，唔係一件易事。」老賢說出自己想法：「而且要係一個適當嘅時機行刺，如果係呢段時間殺死佢哋嘅話，不良人同上面班權貴就有好充足嘅時間去協調番。」
「所以...要喺不良人進攻前一、兩日刺殺佢哋，令佢哋喺短時間之內協調唔到？」我問。
「嗯。」老賢又說：「要暗殺嘅人，唔單止董倫。」
「仲有個對不良人夫婦間諜。」我皺一皺眉：「但係佢哋平時都唔會落去八樓，要上去行刺有一定難道......」
老賢倒是提出了一個方法建議：「原本兩星期之後，係大本營每半年一次嘅「營火會」，算係一個喜慶嘅活動......到時大家都會表演，根據過往經驗...個陣八樓嘅人，都會罕有咁落去行下。」
「你宣佈將個營火會推遲到不良人行動前嘅一、兩日？再喺活動舉行個陣，派人暗殺馬德梵、佢老婆，仲有董倫。」我說。
「可以做得到。」老賢點頭。
那晚，我跟老賢商量討論了一夜的計劃。
初步制定了的計劃，便是在營火會當日派人刺殺上述的三個人、讓公仔和娃娃成為雙面間諜留意情況、慢慢解除八樓人士的一些重要的職位，例如大門開關、食物安全等重要的的位置。
還有在之後兩個月多的學堂課程中，由對付病者的教付，變到教導對付人類的教學。
我要我的學生，能夠在「不良人」入侵當日，拿起武器抵抗對方。
為了這一天的到來，我暫時把攻略「病童」一事放低。
然而...
我卻漸漸忘記了，大本營還有Dr.D的存在。
他到底是邪是正，我似乎到現在都沒能看穿。
同時，我也漸漸感受到「重量」。
像......整個大本營的「重量」，都壓在我肩膊上。
從何時開始...
我這般麻目地守護住這兒？
我自己也忘記了...還記得，我想當初進來的志願，就是儲到一大筆物資，再到其餘的倖存區過活。
到底是哪時候開始的......
我逐漸被同化了？
被認同了。
「今日落堂。」課堂結束後，我一貫冷淡的聲線交代下課。
「再見老師！！」、「鳥嘴老師bye～～！！」、「老師！下堂試下教我點樣搶對方武器。」
那些一開始討厭我的學生，又是什麼時候......尊敬我了？
一切一切的事，都好像在我沒為意之中轉變，就如同我的心一樣。
「黑袍老師！要唔要嚟一齊食飯啊！？」在我準備步出學堂時，大舊叫住了我：「我哋今晚一班老師同營內識嘅人一齊食。」
在大舊後面站住談天的，有好久沒見的阿玲、夏晴、阿登，大舊說到我的時候，他們三個也不其然地望向了我。
和他們一群人彼此對視了好一陣子後，我才搖一搖頭，步出學堂。恰巧，左邊走廊正前來著兩個人，是第一次跟我對付病腦的推車手漢森與天明，還有剛從右邊樓梯上來。
「呼...」少佐雙目一如既往的鋒利，推門進學堂了。
「少佐～你又遲到啦！」夏晴說。
「係囉係囉，請飲嘢啦！」阿玲笑住附和著。
「遲到好過冇到...」少佐淺淺地答。
阿登亦向同時進來的二人揮手：「Hey，漢森...天明！」
「喂！後生仔，教書教成點啊？啲細路係咪好唔聽話嫁？」天明一來便問。
「頂...最近我轉行去工坊搞武器生意，攰到呢～」漢森按一按膊頭。
「各位！要唔要品嚐下我做嘅菜湯！哈哈哈哈！！！」大舊大聲地自說自笑著。
我鼻頭，卻不知為何一酸。
大概...
每個人，都有自己背負住的命運吧。
「喂～阿尼啊阿尼，你唔可以咁嫁！所謂盜亦有道，商都有商道，佢賣個價呢，就分明係呃小市民錢嘅！」落到市集，見到愛紗正指住前面的攤檔，對王達尼他說教。
「商人都要搵食嫁～犯法咩。」自己本身就是大黑商的王達尼反駁。
原本只是打算來市集逛逛的我，還是回到去天台之上，那一個屬於我的地方。我把那本已經完成一大半的《病者圖鑑》拿出來，自己閱讀一遍。
「好...」閱讀完畢後，我合上書本，在面具下淺笑：「...完成度都幾高。」
不過...
我寫出來供自己自娛，也沒什麼意義吧。