我跟公仔跑回返路，往前去停屍間走廊的路再行一次，打算可以重遇娃娃，可......就是連鬼影都不見一隻。
更奇怪的是，剛才在地下層中不斷掙扎想要把傘子和軍刀從嘴巴拉出的病嘴，如今死翹翹在樓梯口前。
我慢步地上前查看，試圖從死去的它身上撿回自己的雨傘和公仔的小軍刀，
成功了。
病嘴死後，唾液就如同稀水一樣，失去了強大的舔力，很輕易就把我倆的武器扯回出來。
「佢點解無啦啦死咗...」公仔既畏懼，又深疑：「啱啱明明仲...」
「佢個嘴...」我又蹲下來，查探它的死因：「似乎受到硬物襲擊...」
「娃娃冇可能有咁大力...而且佢手上得急救包，邊有可能......」
「周圍睇下，除咗我哋之外...仲有第三者存在喺呢間醫院。」我站起，對公仔說：「既然對方知道病嘴弱點係嘴部，仲刻意攻擊......咁證明對方係個人類。」
「......醫院咁大，我哋去邊到搵？」
「既然我哋返嚟個條路見唔到，即刻...對方會喺反方向。」我開始握住電筒照住路面。
「點解娃娃個陣會跟唔上......」公仔說到此處，腳步突然停了下來，還好我留意到了。
「做咩？」我轉頭。
「我隻腳...郁唔到...」公仔想用力踏出一步，但地板就是有股引力吸住他的鞋子。
我把電筒往他雙腳一照，才發現地上有些奶白...接近透明色的舔液，緊緊地舔住公仔的鞋子。
「係病嘴嘅口水。」我走過去，強行抱起公仔助他掙脫舔性唾液。
花了好大的力氣，鞋子還是貼得很實，我放棄了......索性叫公仔倒不如光著腳走。
不然，在這裡玩扯鞋遊戲也沒什麼意義，實在舔得太緊了。
「唔好要對鞋...」我說。
「......好啦！」公仔似是做了極大掙扎，決定脫下自己的真皮男裝鞋。
一雙鞋子不貴，但在亂世就十分珍貴，不過我相信公仔他父母親有能力再給他一對鞋子的。
我們找了一整層，也不見得娃娃就在附近，不過...她卻無意地留了些很細微的線索給我們。
我繼續用電筒照射住地面的線索：「頭髮...仲要係灰色。」再望前一點，那些跌落的髮絲彷彿一條一條的形成了路，引導我們去尋找娃娃。
「佢個陣肯定試圖掙扎......先會跌咁多頭髮...」公仔拾起地上的頭髮來看，緊緊握住：「點解佢個陣唔大叫...」
「或者...對方當時有武器喺手脅持住佢，唔俾佢出聲。」我想，最壞的情況出現了。
「老師，啲頭髮一直跌到上去二樓嘅樓梯......佢帶咗娃娃上去。」公仔說。
「唔，我哋上去吧。」
我與公仔一起跟隨住髮絲的掉落，上到了靈實醫院的第二層。上面跟G層相差無幾，主要的走廊通道滿滿的障礙物，走路都要左行右轉。
「娃娃俾人捉咗去更上面...」公仔望住樓梯口。
「我知，不過反正經過二樓，就帶埋瑜小六佢哋走先。」我望住前方雜亂的通道。
「咁...但係...佢哋把聲已經消失...」
我一邊一邊說：「可能呢一層仲有病者，佢哋唔敢出聲。」
病者和醫院，很相襯的地方。
我們在沿路上用電筒照向周邊的病房，想要找出他們的身影，可惜就是不見，直至二層的某處突然發出響亮的玻璃碎裂聲，我們和公仔才馬上趕去，發現一隻滿身紅點的病者，正歇斯底里地拍打著一間病房的門。
普通的病者...？
漸漸地，受電筒光線照射的它轉身望向了我和公仔，然後...張開一把充滿尖牙的嘴巴！牙齒...到底有多少！？根本數不清，密密麻麻的佈滿在口腔之內，令人皮膚看也發麻，其牙齒的嘔心之處在於密集。
「佢望住我哋......」公仔開始想要退後。
「又係新病者...到底仲有幾多...」在未得知眼前病者的能力和弱點之前，我都不會輕易進攻。
「佢啲牙齒...睇落就係特別之處...」公仔也留意到。
怎樣對付它的牙齒才是重點...
漸漸地，它開始跑向了我們！
我們正面相對後，才更加清楚它的外表，腮子兩邊都異常地鼓脹，入面盡是密不可分的人類牙齒，感覺像是一部絞肉機般，只要你把手放進去，不需幾秒就馬上變成免治牛肉。
見它正衝向我們，我便拉住走廊亂放的病床推車擋住它的去路，然後快快退後。
「老師...呢隻病者要點對付...！」公仔跟我不斷往後逃跑。
我答：「我都未見過，又係新型病者......」似乎比大本營要遠的地方，還有更多我們未知的存在。
此時，一旁的房間突然傳來輕敲之聲，我用電筒往裡頭一照才見到阿文他藏了在裡頭。
「老師！！」他馬上跑出來，激動地抱住我。
「...」
「我哋...啱啱有隻大眼入咗嚟醫院...見到我哋之後尖叫，然後好快就有隻成口牙齒嘅病者嚟追殺我哋！！你搞掂咗佢...！！？」阿文極為緊張地說。
「未......喺隔離。」我轉頭，望向走廊另一邊。
那隻...暫稱為「病牙」吧，它跟我們的距離不足十米了。
「啊呀呀！」阿文嚇得叫起上來。
「嘎嘎嘎啦啦！！！」病牙二話不說，就衝向我們：「嘰嘰嘰！」
我馬上提起雨傘往病牙口中一戳！它疑似沒受到任何痛苦或傷害，反倒密密麻麻牙齒不斷地郁動，像是絞碎著我的雨傘......
我立即把雨傘扯回出來，短短幾秒，尖端的位置已經有些少破損及咬痕。
「我估佢弱點都係口部...牙齒始終係骨骼嘅一種。」我猜測，說：「不過近攻已經無可能對付到佢......佢會咬碎一切嘅嘢，阿文靠你。」
「吓！？」阿文變得更顫：「我唔得架...」
「...得你把釘槍先做到。」在這裡，我們的近身武器完全奏不了效。
不是被強行舔住，就要被強行咬碎......
恐怕只有釘槍...這般發射後含有強大衝擊力的武器，才能對付它們。