為期一個月的大本營訓練班不經不覺就結束，初初十多個對病者都一曉不通的青年人，都成為了大本營的準搜索隊。
那次中午聚餐後，我跟瑜小六的關係好了不少。上堂後有不懂的地方都會轉身問身後的我，我總是樂意解答並附上自己的見解。
例如，其中一條情境題：在街上見到流浪的倖存者，要否跟他接觸？
大舊的大本營官方式答案是不應接近，而我的答案則取決於對方身上物資的多寡，世界上沒有必然的決擇。
「你哋之後會開始第一次嘅出外搜查，記住...出到大本營，就係第二個世界。」跟他們整個月都朝對夜見的大舊，沉重地提醒猶如親生兒子的學生：「生存落去得一個方法......團結。」
「得啦，大舊Sir！我哋實唔會令你擔心，我哋幾個人一條心，病者嚟都無有怕！」一位男學員自信地喊著。
「係先好，你哋聽日會分兩隊，A隊同B隊！」大舊手插著腰，在圖書館橫視眾人：「你哋呢班十四個人，就每隊七人，自己分組！首先聽日A隊會出發搜尋物資先，之後再到B隊，明唔明？」
「明白！」
「沙──」雨，又下起來。
明明身在大本營的這段日子中，每一天都陽光明媚，可在我們準備出發的前一日，陰沉的烏雲又再聚集起來，然後下起場大雨。
從圖書館的落地大玻璃窗前望往外面，外面的空氣彷彿又再冷了幾分。
「喂！M，同唔同我哋一組？我哋B組。」瑜小六又在玩她那拍人左膊站人右膊。
「我可以。」我回首、點頭，望住其餘五個男生。
我B隊的同伴相比起A隊那伙自信滿滿、帶點興奮的傢伙們，氣勢輸掉了不少。
沉默的嘴巴，低寂的眼神，都如同即將被送上戰場的少年軍般，儘管在訓練營中跟同伴有過多少的快樂與友誼，知道自己即將要上戰場也是會懂得害怕。
「唉......呢日終於都嚟...」B隊中頭髮有點捲戴住圓框眼鏡，名字好像叫莫文的青年苦惱地嘆氣：「想免費食咁多餐飯果然就係要付出代價...」
「其實我都有啲後悔......」隊中另一個棕金長髮的胖子握住拳頭，臉上極是擔憂：「個陣明明好有動力想參加志願軍...但係呢家......唉！」
「實際上，同諗個陣唔同。」我主動走入他們苦惱的圈子中：「我有時都會咁。」
其中幾個抬起頭望我：「...M？」
「我邀佢入隊嘅，ya！」瑜小六舉起V字手勢，沒有男孩們的畏退之色。
「大舊講得無錯...只要合作，就會無事。」我回想起第一次跟阿登、漢森、少佐、天明等人在病窩時的情況。
「但係我直頭唔想行出去啊！！我想收埋自己喺大本營求其一間房仔就算，我寧願餓死都好過出去......」長髮胖子毫不忌諱地說出心裡膽鼠的想法。
「點叫你？」
「叫我肥西啊～」他如同已經自我放棄一樣，頹喪地說。
「出去唔一定係為大本營，可以係為自己。」
「咩...咩意思...？」肥西眉頭一皺。
「只要你喺外面求其執到一包煙，運到返嚟...你喺大本營都幾乎唔洗憂。」我說。
「但係搜索隊第一條手則就係...唔可以私藏任何物資，全部要充公喎...」叫莫文的捲髮青年低聲道。
「規矩係死，我哋係生...唔洗理咁多。」
「...」瑜小六聽完我的說話後，靜靜地凝望住我：「估唔到...你會教我哋做衰嘢......」
我覺得這樣說的話，才能提高他們出外搜索的意欲。
「但搵到煙個啲奢侈品又點喎！大本營嘅食糧行配給制，你呢啲嘢又唔可以同大本營換到特別多食物，最多換到市集上嘅一啲靚武器...」肥西繼續說。
「你只係諗住...呢個世界得大本營一個地方？只要一發現其他生存團體，都可以將煙賣俾佢哋，換取更多暴利或者食糧。」長遠投資雖然看似永無了期，但假如成功孤注一擲，將會得海量的成果。
「但係...家下從商咩......」
「隨便你點諗...只係我覺得，既然出去搜索係用自己條命去做賭注，所享嘅成果就唔可以單單只係大本營。」
「呃...」
「自己諗。」
我之前從病窩偷來的煙，就彷似金條一樣，一旦陷入什麼困難，隨便拿一包出來都能輕易解決。
這個社會經過人類一年的搜索，煙這種東西本身已經所餘無幾，再加上它有令人上癮的成份，所以我當時才執著寧願多拿一把香煙走，也別管架上的食物了。
B隊成員聽過我的一番說話後，也微微地點頭：「即係M...你始終覺得，大本營有一日會玩完？所以偷定啲煙......」
「有可能？始終...搜索嘅人少，用資源嘅人多，成個大本營嘅社會體系崩潰只係遲早嘅事。」
恰好，午飯的分配廣播響起。
「去食飯啦！」肥西、莫文等人一聽到就跟著圖書館的大伙兒湧了出去。
望住剎那人去樓空的圖書館，又望望跟我呆站在原地的瑜小六，彼此不禁苦笑上來。
「你其實呢...唔洗咁認真講解俾佢哋聽嫁，佢哋完全都聽唔入耳。」瑜小六笑我的傻：「但點解你會有咁嘅諗法？」
「因為我係悲觀主義者...呱？」
「哈哈哈哈哈......」瑜小六用拳頭敲我的額頭一下：「成日咁認真。」
「...」
「去食飯啦，悲觀大師。」瑜小六轉身就離開。
翌日。
新人A隊出發往大本營指示的地方──將軍澳中心。那裡跟大本營距離好近，而且大本營中老練的搜索隊每三天都會到訪一次，所以該區的病者基本上已經被殺絕，是很安全的能讓第一次外出搜索的成員去嘗試拿點經驗。
搜索隊行裝很簡單，每個人都要帶個大背包擺放物資，武器則自己合手就可以，隊長更能手持無線電與總部聯絡，只是太遠的過就會訊號不清。
喜歡在雨天的日子站在天台觀望住天空的我，沒有為意到少佐出現到我身邊。
「都已經一個月，你哋個班好似今日出發？」少佐站到我旁邊，跟我一起靠在欄杆上。
「嗯，分咗A、B兩隊，我係B隊。」無聊的我伸手出去，用掌心感受滴落的雨水：「咁你點，搵到大本營嘅間諜未？」
「暫時鎖定咗個目標，不過仲要深入調查。」
話題終結了，我盡本份打開新的話題：「...你又知喺到？」
「以前間中落雨嘅日子，都會見你上嚟天台。」少佐淡笑。
「冇太陽、又落雨、又有風，幾舒服。」我說。
「我反而鐘意太陽。」少佐望住陰沉的密雲，眼光依舊帶住銳氣：「呢種日子，最討厭。」
接著，我又與少佐東談一些，西談一些，感覺說得不多，但實際上已經過了差不多四個小時左右。
上至對大本營的制度看法，下至市集中哪款武器合手好用，都會爭議一番。驀然發覺，人生就是要有個不斷跟你辯駁的對手，所說的話才來得更有意義。
「噠噠噠...噠噠噠......」忽然，一陣急速的腳步聲將至。
「砰！」繼而，天台的門被大力推開了。
是大舊。
「嗄...嗄......嗄...」他如同一頭牛，喘住氣的衝了上來。
「大舊？」少佐望住他。
「少佐...M......今次死...今朝出發個隊七人新手搜索隊，佢哋喺搜索地點失聯超過六粒鐘。」
「轟隆──！」天空恰好劃破一條閃電於空中。
「又係...失聯？」少佐問。
「係...！」大舊咬牙切齒，捏實拳頭：「可能佢哋遇到病者......」
「照理...個一區商場嘅所有病者都已經殺清，佢哋遇到嘅機率好低，就算遇到應該都有一兩個跑到返嚟回報。」少佐分析。
「去調查下就知。」我直接說。
「個班老屎忽搜索隊已經連續幾日出去搵物資，好攰...應該冇多餘力氣去調查！一係我去啦！！個班係我嘅學生嚟！」大舊大喊。
「唔好，」少佐制止住衝動的大舊，說：「老賢吩咐過你只可以留喺大本營，教導學生。」
「但係...！！！！」
「唔洗但係，唔准就唔准。」看來少佐十分遵循老賢的話。
「咁可以點算啊！？成個大本營可以用嘅人力得咁少，有經驗嘅人又唔係好多！」大舊生氣得拍打欄杆。
「M。」少佐望向了我。
我走到少佐面前：「搵番班學生？」
「搵番固然好，但首要原則係保護自己安全，如果見到佢哋屍骸......你就立即撤隊返嚟大本營。」少佐提醒。
「你...你自己一個人去！？」緊張的大舊問。
「唔通點......帶埋B隊班學生去？」我反問。
「咁都好過你自己一個人去，M。」少佐語氣峰冷。
「你唔驚我...害死佢哋？」
「少佐...會唔會唔係太好...個班學生連病者都未見過...」大舊面有難色。
我凝望住大舊，他臉上愛護學生的樣子......不是裝出來。
「無錯...」我認同大舊的說話：「佢哋連病者都未見過，就無謂去拖累我。」
「班學生條命有價，但係M你都有。」少佐只淡淡地道出一句：「我信你可以統領佢哋去調查。」
見大舊沒有再駁回少佐的話，只能憂心忡忡的盯住地板，我便開腔問：
「你想我幾時出發。」
「越快越好。」
於是，我立即就動身落樓，在大本營休息室找來了經常在該處閒蕩的阿登。
「M？好耐無見！」因為這一個月多都在圖書館上堂，我跟他見面的次數十指可數。
「幫我準備七把武器。」
「下...你又想點啊......」
「要出去一轉。」
「去邊啊...？」
「再問你都要跟埋去。」
阿登馬上緊閉住嘴巴，小聲說：「我已經幫你去市場搵搵......」