泉叔睇一睇器皿中嘅血液，再望一望隔離籠裡嘅兔子人。
「喂，你可以解脫啦。」泉叔輕輕一踢個鐵籠，蹲喺佢前面。
「......」兔子人殘破嘅眼皮，好似稍為睜開咗一點點。
而污糟嘅兔耳，亦對聲音有少少反應，輕輕咁郁一郁。
「佢都攰。」泉叔點點頭，轉身望住我：「政，俾唔俾到一個痛快佢，呢把刀。」
「我唔知，但我盡能力。」我都係第一次真正用依把刀。
我不自禁咁緊握住八赤刀，可能仁慈嘅殺害，係最悲痛。
「我會對準佢，心臟。」我行上前。
「好......」泉叔嘅視線定定咁望住兔子人。
我深一口大呼吸，將刀尖貼喺鐵籠前，做好準備就會一刀刺入去......
「嗖！」
沉重之極，又快速靜止嘅一聲。
八赤刀刃完全刺入兔子人心臟。
「蓬～！！！」
一秒間，青藍色嘅火焰從傷口位置湧出偏佈兔子人全身！
十秒、
二十秒、
三十秒、
兔子人被彷彿嚟自地獄嘅業火，吞噬住全身。
直至燃燒殆盡。
我既為依把刀喜，亦為依隻兔悲。
喜嘅，係因為「八赤刀」真係對兔子人有用。
悲嘅，係因為依隻兔子人，係個曾經同我好相似嘅人。
「走吧。」泉叔頭也不回，離開地下室。
無耐，沅彤同宋文德佢兩個拎住一袋二袋嚟咗，兩人同泉叔簡單打個招呼後，就開始忙食嘢嘅事。
因為，佢哋買嘅係打邊爐材料。
「你哋要嘅生雞蛋。」沅彤兩打雞蛋擺上檯。
「你要生食定熟食？」我問泉叔。
佢要熟嘅，就唯有搵水淥一淥。
「最好就生啦，嗰陣喺你面前食熟蛋都不過係唔想嚇親你。」泉叔說。
喺沅彤同宋文德喺廚房處理食材嗰陣，我行咗講去同佢哋講一件事。
「我啱啱用咗八赤刀。」
呢件事對於佢兩個嚟講，好似好震驚，事關佢哋一個洗緊菜，一個切緊菜，聽到我咁講之後都停低咗。
我講埋落去：「拎泉叔地下室隻兔子人嚟試，斬落佢哋嗰身之後，係會有藍色嘅火焰出嚟......」
「係業火。」兩個異口同聲咁講。
即係同《異鄉人》日誌講嘅一樣，八赤刀會用地獄嘅業火吞噬邪物。
「應該等埋我哋先用。」沅彤說。
「嗰隻兔子人多留一秒喺世界，就多一秒傷心。」我淡淡咁講完，就去雪櫃拎枝啤酒飲。
火鍋好快就準備好，不外乎都係嗰啲食物，乜乜肥牛之類。
我哋一直以嚟辛苦咁耐，就將呢日當係放鬆下。
我哋四人坐喺圓檯前乾杯，就開始又飲又食。
雖然沅彤同泉叔第一日見大家，但可能彼此都出自同一個鄉下，所以幾啱嘴型，泉叔當正佢係個女咁，係咁講啲有趣小故事，人生大道理佢聽。
至於宋文德就靜得多，佢食嘢應該好少講嘢。我發現佢食嘢係有個好變態嘅習慣，就係特別鐘意落玫瑰鹽，完全唔知咩口味嚟。
沅彤睇落係個沉靜清寡嘅女仔，但佢可以無聲無色咁飲完一罐又一罐啤酒，塊臉最多只會有少少白裡透紅，而唔會表露出醉意。