我出去外面嫁車到，按照泉叔指示去將副駕座位拉開。
果然！入面真係有暗格，仲放咗個八角型嘅盒。個盒大一般月餅盒少少，外面嗰層係用玻璃嘅透明物料，而側邊同底部就係銅鐵質地，至於盒入面居然有隻老鼠......
冇睇錯，
係隻老鼠。
一開始我唔為意嗰陣，暗暗嚇咗下，但諗諗下隻老鼠都有手心咁大，應該無位置可以瓹入去，所以隻老鼠應該俾人刻意放喺入面。
至於點解要咁做，我唔係太明。
「泉叔......你係話呢個盒？」我拎咗個八角型鐵盒入去，說：「但係入面好似有隻老鼠......」
「嘿...入面有隻老鼠就啱，拎小波比過嚟俾我睇下。」泉叔長期苦澀嘅表情中，露出一絲笑容。
「隻老鼠叫小波比？」我拎過去。
「老友......好耐無見。」泉叔望住盒中嘅老鼠，比起見到其他人都更開心。
就喺佢哋培育感情期間，我忍唔住問：「唔好意思泉叔，呢隻老鼠係你隻寵物......？」
「係我嘅拍檔。」估唔到，泉叔係答案係咁。
「拍檔？」
「就係靠佢，當日我先可以見到你，細路！」泉叔咳一咳，抬頭望住我：「係時候教你一啲真正嘅狩獵技巧。」
「咁...咁突然？你之前唔係教咗我一次啦咩？」
「你見我咁嘅死樣，就知我呢排都會無咩戰鬥能力，既然係咁，教定你差唔多，同埋我對已經睇得出你嘅覺悟。」
「覺悟？」
「當初你眼神銳利而猶豫，但我宜家逐漸覺得你眼神篤定。」泉叔怔咗一陣，續說：「政，呢條路一行就無得返轉頭。」
「明白......」
「首先，呢個八角型嘅鐵盒，叫做「鼠盤」，佢係可以用嚟大約咁追蹤兔子人位置。」泉叔慢慢介紹手上嘅工具：「入面隻老鼠，其實係一般老鼠，但我就俗稱叫「尋血鼠」，一個簡單嘅步驟，你就靠佢搵到兔子人。」
「係...」我全神傾聽。
泉叔掀開自己張被，喺自己明顯特製過放便收納物品嘅皮帶中，拎出一個細細嘅小瓶，入面裝住三毫升左右嘅不明血液。
「呢一小瓶，係兔子血。」泉叔用食指同姆指拎住，然後拉開一個足夠小瓶倒血入去嘅開口：「只要你將呢到小小血倒入去，尋血鼠小波比就會開始嗜血......」
我靜心咁睇住泉叔嘅每一步。原本喺鼠盤入面無太大動作嘅老鼠，真係開始郁動。
佢慢慢咁行向血液傾倒之處，然後喺到啜飲。不知不覺，老鼠嘅皮毛開始悚然，小眼珠亦漸漸深紅。
「飲咗兔子血會有咩影響，你知唔知？」泉叔問。
「唔知。」我望住隻老鼠，好似開始要發狂咁四處奔騰。可惜嘅係，佢俾個盒限制住自身嘅活動範圍。
「只要飲咗兔子血，就會好似兔子人咁聞到「靈魂」嘅氣味，即係嗰啲「復活蛋」，有效範圍大概係五份之一個香港左右。當隻小波比聞到復活蛋喺邊，就會好似兔子人咁對吞食靈魂產生渴求，而不斷向某個方向前進。到時你根據呢八角型嘅盒，嘅八個方向，睇小波比向住邊個方位不斷跑，復活蛋就大概喺嗰個位。」
難怪鼠盤八面，都分別寫有「東」、「南」、「西」、「北」、「東南」、「西南」、「西北」、「東北」呢八個方位。