我貼住門去聽，聽到房入面係一個男人痛苦嘅呻吟聲，而且呼息越嚟越緊湊。驚發生緊咩事嘅我，輕輕咁推開佢道門，結果係個不斷用頭撞擊地面嘅男人。
佢做住跪拜姿勢，額頭一下又一下沉重咁打落塊冰冷冷嘅地到。
佢疑似聽到我開門，於是緩緩咁轉望住我，然後呈現出幸福嘅笑容......
「拋脫肉身束縛嘅最好方法......就係...不斷提煉自己精神......同意志......」佢成個頭，可謂係滲滿血：「痛楚......就係最佳嘅提煉品......」
「你流哂血......」我合理相信，佢今晚繼續撞肯定入院。
「只有昇華精神層面！！先係進入「樂園」嘅正道！！！」佢講完，又繼續將頭撞落地板到。
佢呢種俾邪教控制嘅人，我都顧唔得咁多。
香港有七百萬人，總有一、兩個相信宜一套歪理講法嘅人。由唔知幾時開始，三十分鐘後、四十分鐘後？嗰間房就再無傳嚟撞頭嘅聲音。
大約夜晚八點幾，沅彤仲未返，反而宋文德再次嚟到宿舍。
「我大致上查哂，成個教育營所有角落。」
「有冇搵到發現啲咩？」半日無見，佢眼睛又冇咁紅。
「無，但我遇到一個奇怪嘅求導者......」第一次見宋文德臉上掛住深深疑惑嘅表情。
「唔係個個都奇怪嘅咩？」
「嗰一個求導者，似乎知道我見過第二個世界。」
「唔通係之前我過第七關，要我交鏡嗰個......佢係會掩住對眼，又笑又喊咁喃喃自語？」諗嚟諗去，都係好似得嗰個有啲神秘。
「嗯，我追問咗佢好耐，佢話......」宋文德諗咗好耐，先決定講出嚟：「呢個係「紅神目」嘅恩賜。」
「咩意思......」
「紅神目，即係佢哋敬畏、跪拜嘅神明嘅名字，而我對眼最近成日望到唔屬於依一個世界嘅事物，係因為我直視過水井下嘅另一個世界，嗰個求導者曾經都發生過一樣嘅事情。」
「咁呢份「恩賜」......會有咩影響......？」喺邪教徒口中嘅恩賜，我會覺得係詛咒。
「暫時未知，不過佢講嘅嘢都唔可以盡信，畢竟無任何理論根據。」宋文德掩住眼睛，淺淺一笑：「可能我只係最近精神壓力太大有幻覺......」
「離開宜到之後，你真係要好好抖下。」我真心覺得，宋文德比我做得更加多。
講下講下，宿舍入口外有個清瘦嘅身影接近，係沅彤佢返嚟。
「沅彤有冇咩事？」我見佢神色正常，應該無事。
「根本......就無見到個主教。」沅彤說。
「咩意思？」
「入去之前會搵塊布蒙住你對眼，無人例外。」
「最後一位信徒，可以去見主教。」宿舍外，一位重生會成員微笑請我過去。
「政。」臨行之前，沅彤叫住我：「無論佢講啲咩，都唔好動搖。」
我對沅彤點一點頭，就跟宿舍外嘅重生會成員出去。
我走無幾遠，宋文德就開始同點頭之交都稱不上嘅沅彤，講彼此之間嘅第一句嘢。
「有冇興趣，一齊去拎返啲寶物。」
沅彤怔怔咁望住佢，諗咗一諗宋文德講咩之後，表情漸漸轉為會心一笑。
由於入夜之後無燈，一路上我都跟實前面嗰位成員，去到全教育營最深入嘅地方禮拜堂之後，佢就停低喺門前，拎咗個黑色眼罩俾我。
「請戴住。」重生會成員咁樣要求我。