「我一日仲未搵到我要搵嘅人，都唔會訓得著。」我不自覺，捏住枕頭。
「可唔可講下，點解八方鏡會喺你身上？」
漆黑一片，見唔到對方，只係聽到聲音嘅環境下，反而令我哋交淺言深。
「因為......」沅彤頓咗一陣，講：「佢原本係屬於我嘅嘢。」
沅彤呢一句話，令我震驚咗一下。
「你嘅嘢......？」我說。
「應該係話，係我婆婆......即係我家族嘅嘢。」
「你婆婆叫......蘇清瑜？」我諗返起，內村過夜嗰間小屋。
「係...。」沅彤語氣都似乎有啲訝異，點解我會知佢阿婆個名。
「塊鏡係我有次上鎖羅盆內村，喺佢間屋搵到。」我解釋點拎嚟。
難怪過第七關個陣，沅彤對八方鏡有所認知，眼神間仲有啲唔捨得......
原來係佢家族嘅嘢。
去到宜到，我都已經幾相信佢係同路人，所以我都講出拎走塊鏡嘅目的。
「我係拎嚟殺兔子人。」我說。
「兔子人，唔係用鏡殺......」
沅彤補充一句：「係要用刀殺。」
「刀？但係......」
「八赤刀。」沅彤呢一句，令我自動靜咗落嚟。
因為聽個名，都知唔係一般刀。
沅彤講落去：「係把刃身反光面呈現鮮紅嘅武士刀。可以斬妖除魔，令佢哋死於業火之下。」
「咁...邊到可以拎到把刀！？」呢個情報重要到，連我講嘢都有啲結舌。
「搵返八赤刀，正正係我入嚟嘅目的，亦係我婆婆臨死前交代我嘅遺願。」
「咁即係把刀喺「重生會」手上？」如果係咁，事情就好嚴重。
「唔知，但我曾經到過佢交代封印嘅小島搵過，去到嗰陣......」沅彤語氣有些少凝重：「已經發現俾人奪走咗。」
「所以你覺得，最有可能偷走八赤刀嘅，就係「重生會」。」
「我婆婆走之前幾個月，我成日喺醫院嘅床邊陪佢，佢意識好模糊咁，同我講咗好多...關於自己以前嘅事。包括......佢鄉下即係鎖羅盆村，以前有個小教叫「重生會」，個信仰係佢間接引入。」
「居然！？」
聽故仔，變成我喺呢到嘅唯一娛樂。
「佢年輕嗰陣，大約二十、三十年代......遠渡嚟咗香港，帶住家族三件寶物，隻身去咗鎖羅盆。」
「目的係？」
「佢無講到，但係佢上山之後撞正鎖羅盆橫風橫雨，佢一時之間遺失咗其中一件神物，「八赤勾玉」，不過好彩嘅係，遇到正趕返屋企嘅獵戶救咗佢返村」
一講獵戶，我又諗起泉叔。
沅彤繼續講落去：「因為唔見咗八赤勾玉，所以婆婆亦留喺村內居住咗陣，諗住搵返走，結果某日，村內有人話見到奇怪生物......」
「就係兔子...人？」我估。
「係隻明顯由兔演化而成嘅畸形生物，婆婆話因為外觀太恐怖，所以佢大過之後都選擇性地遺忘咗呢段記憶，係離開之前一刻，種種記憶先好似潮水咁浮現返。」
「畸形生物......」我開始腦補緊，到底會有幾恐怖。
「婆婆聽到呢個消息嗰陣，就知道山林入面有某隻兔食咗八赤勾玉落肚，而變成佢哋見到嘅畸物。由於嗰隻生物吞咗神物落肚，演化成半神嘅存在，如果佢侵略性強，係有一定危險性......所以，我婆婆就引用咗日本一個傳說──「因幡之白兔」，呼籲大家唔好接近佢，對佢敬而遠之，而自己就繼續搵嗰隻兔。」
「結果搵唔搵到？」