成朝都烏雲密佈嘅天空，太陽完全被覆蓋住。
呢個時候，重生會嘅課長拎咗堆三文治出嚟分俾大家，唔知係咪心理作用關係，佢哋派嘅嘢我都唔係幾想食。
我望一望第六關，嗰到只係企咗寥寥幾個人。
因為喺第五關，已經大幅減少咗好多人。
唔知嗰個女仔，依家喺邊？
我抖咗陣，深一深呼吸，繼續踏上自己嘅拯救之路。
「請入去。」一到第六關，重生會職員就叫我行入一間全黑嘅房。
咁啱，其中一間黑房行咗一個人出嚟......係嗰個女仔。
佢出嚟嗰陣......
精神疲憊之餘，眼神更有少少呆滯，到底喺入面係咩挑戰？
「通過。」求導者喺佢張遊戲卡上吸印。
我懷住戰戰兢兢嘅心情入到間黑房，入面係伸手不見五指嗰種黑。
「保持跪拜姿勢，並且抬頭直視紅光，直到結束。」黑房外一把聲，說。
「咯」門鎖咗。
隨後，房內慢慢傳出《紅神目詠歌》，即係佢哋嗰首赤日赤日乜乜柒柒......
其後，房內出現兩顆紅光，就好似兔子人嘅紅目咁。出現嗰下我係嚇到退後撞到牆，因為感覺就好似同某隻兔子人身處於同一空間咁。
為咗順利通關，我只可以喺心理極度唔舒服嘅情況下，做出跪拜動作，然後抬頭直視嗰一雙紅光。
慢慢地，佢哋房間內嘅邪教歌越播越大聲，兩隻耳無處可逃。而黑暗嘅環境，亦令空間感無限增大。
恐怖嘅倍感，亦都無限增大緊。
喺宜種情況，我心理壓力越嚟越大。
一開始只係以為跪一跪拜，聽一聽歌、望一望光，都仲頂得住，至少唔會難得過喺鎖羅盆生存嗰晚。
但係，原來咁做係更加折磨......
至少嗰陣，我手腳仲可以郁，精神完全放喺「逃生」一事上。不過宜家周圍空無一物，就完全感受緊其餘觀感帶嚟嘅衝擊。
喺嗰陣，我眼神學識漸漸放空......
腦入面，回想緊第二啲事情，去避開依一切苦楚。
就好似被一道白光淡現，腦中出現咗個畫面。
係我初初相識Chloe嗰陣，係因為睇完某套日本純愛電影之後心血來潮，就走咗去學日文。
之後，就同佢成為咗同學。
佢叻過我好多，用幾年就考到個N1返嚟。
呢一刻，過往種種記憶如潮水般湧現......
當我回神過嚟，可以出去嗰陣，外面嘅職員同我講，宜家已經係四點。
我眼神仍然保持住放空，一時間好難集中返，拖累到動作都有啲緩慢。
「通關。」職員好滿意咁望住我個樣，然後幫我吸印。
而我個腦，好似一時間短腦咁，諗唔到、聯繫、幻想唔到任何事情，暫時只可以持續放空一陣。
我好似老人痴呆咁，走咗去張長櫈坐。
我坐低個下，先發現嗰個女仔就坐喺我隔離，佢同我神色相差無乎，我諗我哋喺黑房都經歷咗差唔多嘅事情。
「啱啱...出嚟？」比我早入黑房嘅佢，開口問我。
「係......」我隻手，仲微輕咁顫緊。
「有咩......值得你咁搏？」
「咁...你？」我反問佢。
我哋兩個互相都靜咗陣，無答到對方，期間只有涼風輕輕拂過，滿含秋天嘅氣息，我哋衣物都顯得格外單薄。
「我準備去第七關...。」佢企起身細步細步咁行過去。
我都企起身，向住第七關行過去：「我都係。」
我神色疲倦之餘，雙眼更不斷流眼水......
我已經分唔清係嗰陣諗起Chloe而喊，定係因為紅光長時間嘅照射而刺激到流淚。
第七關，位於所有攤檔最入處，亦係最接近類近宿舍同操場嘅地方。我諗嗰啲地方，都係重生會出錢搵人喺塊偏遠嘅荒地興建。
類似邪教嘅大本營咁。