今日天陰陰，天氣有曇天之勢。
我哋比原定時間早到一個鐘，以免錯過「重生會」信徒集合時間。
截至到八點正之前，龍尾村公所前面已經聚集咗大約三、四十人，一大部份係老友記，即係老人家。
另一大部份嘅，係帶埋仔女嚟嘅家庭。
後生嘅真係近乎冇。
等陣...
有，有一個，佢啱啱趕到，係個年輕嘅女仔，約莫二十四、二十五歲左右。
暫時成個氣氛仲係好正常，好似啲社區中心舉辦嘅親子同樂活動日咁，但呢一切一切，喺上車之後逐漸變得詭異......
「佢哋......啲信徒，好似特別鐘意著白衫咁。」宋文德留意到。
「佢哋嗰個睇落精神飽滿，唔似我哋嗰晚喺山上見到嘅求導者。」我說。
「一切未走向極端之前，都係風平浪靜。」
「......」
我望一望泉叔，見佢仲坐喺自己嫁小貨van上面飲啤酒。
過咗陣，疑似比較資深嘅信徒出現，係個短髮嘅中年女士，佢一出現就發言：「各位好！多謝各位嚟到今日「重生會」嘅家庭日啊，你哋咁早起身好叻呀！俾啲掌聲自己先！好無？」
一陣陣嘅掌聲。
「好啦，嫁旅遊巴一陣就會嚟到，宜家有個小任務！」中年女士朝氣十足，完全唔似邪教中人：「就係交哂你哋嘅手機出嚟先，我哋都會想有個可以脫離下科技，感受人同人，仲有大自然嘅機會之旅，再一切了解何謂生命，好無！？」
「好──！」一啲老友記和應。
「開始嚟料......」我無辦法唔拎出手機。
因為喺上車之前，又有個係隸屬重生會嘅男人，會檢查我哋全身一次。
「你兩個去玩得開心啲。」泉叔終於落車，行過嚟拍一拍我哋衣領。
「泉叔你留喺到！？」
「我成身又刀又槍咁，而且點都要留個人喺外面。」泉叔低聲講咗句：「放心，我會跟住你哋嫁旅遊巴尾。」
有佢宜句，我就放心。
「可以開始上車，大家可以叫課長。」短髮女課長介紹自己。
到上車一刻，就好似將自己送入虎口咁。
旅遊巴好奇怪，係用一塊黑布掩蓋哂全部玻璃窗，除咗司機位，無論處於車外定車內，都無辦法望到另一面嘅情況......
上到車，係同一般旅遊巴差唔多格局。
我同宋文德揀咗最後最角落嘅位置坐低，而嗰個比較年輕嘅女仔，都揀咗最後排嘅角落坐。
佢同我哋都有一個共通點，就係都帶住一副隱憂嘅表情。
而其他人，都係相較歡樂。
因為根據譚國源所言，通常會開始參加重生會活動嘅，都係已經俾呢個教會開解咗嘅谷底人士，喺谷底反彈......永遠可以彈到最高。
但跌落去嗰下，
粉身碎骨亦係必然。
旅遊巴開車，駛往一個未知之地。
「你覺唔覺得對面個女仔，有啲特別？」我偷問宋文德。
「特別年輕？」
「特別唔一樣。」
「未知底細前唔好相信任何人，唔好俾宜家嘅和諧氣氛呃到。」
佢講得有道理，我初初都唔知，Chloe屋企人居然會入教。
坐咗陣，重生會成員開始派啲遊戲卡，可以喺上面吸印嗰種，張卡個名叫「七步求導」。
「一陣去到會場總共有七個小遊戲，大家挑戰完之後呢，就可以得到一個見教主機會。雖然唔會為你哋進行「重生儀式」，但會喺求導路上俾一啲指引你，或者賜予你祝福......」重生會課長嘅語氣越講越細沉，剛才上車前嘅朝氣已失去。
同時車外已經無其他嘅車聲好一段時間，代表我哋去緊某個好偏遠嘅地方......？
為時兩個鐘嘅車程，終於完結。
落車嗰陣隻腳都有少少麻。
出到去車外，係個霧氣好重，四周圍都見唔到城市嘅綠林。而個天，亦變得比啱先更為陰沉，好似傍晚五、六點咁。
帶隊嘅女士，最終將我哋帶到一個地方，入面就好似一個小型遊樂園咁，有唔同嘅嘢玩。而且，嗰啲穿袍嘅求導者都喺到。
「偷混入嚟果然唔係個好注意。」我望住周圍，完全唔知係咩位置。