難怪喺鎖羅盆村嘅影片入面，只係見到二十幾個教徒。因為成為「求導者」嘅條件，係經過層層篩選，而且過程極度苛刻。
但咁樣，的確係最有效保持教會隱密性。
真係好想知......
背後控制住重生會嘅到底係咩人。
睇嚟可以問嘅，應該都係咁上下。
畢竟譚國源身份只係一個信徒，最重要嘅線索應該要喺求導者身上先搵到。
「咁你，點解仲未為重生會，奉獻出一樣重要嘅事物。」宋文德問咗條，可有可無嘅問題。
「因...為...我暫時未有勇氣奉獻......」譚國源口顫顫，說：「一旦決定奉獻，就必須七日內完成......否則就會遭收到紅神目天譴！原諒我，求導者......我未有勇氣付出......」
「何解？」
「我唔講得......」
「你必須對我毫無保留，我先可以助你求導。」只能說，宋文德已經扮到入型入格。
「因...為...我聽另一名，信徒講，佢接受咗奉獻，但要奉獻嘅居然係......」譚國源好難吐出個兩隻字：「家人，佢侄女......」
「...你為咗保護家人，而唔接受奉獻，放棄求導機會？」宋文德神情稍為動搖。
「唔係！而係我根本無家人，我唔可以奉獻家人俾重生會！萬一重生會要我奉獻家人！咁樣我根本就無辦法完成......」
「垃圾。」聽完佢嘅解釋之後，宋文德冷冷一腳踩落譚國源個頭。
「噫！好對唔住...我會...我會......盡快搵一個家人返嚟......奉獻俾我嘅主......」我諗譚國源唔明白宋文德罵佢垃圾嘅原因。
「垃圾中嘅垃圾！」譚國源再踩一腳。
「對唔住！」
「如果主，要你奉獻自己性命？」宋文德探討緊佢嘅底線？
「我...我......」唔洗望，都可以感受到譚國源緊張到喉嚨打結：「我可...可......可......以！！！！！」
宜一句，譚國源喊極之轟烈。
突然，佢抬起頭，用頭部不斷對地板猛撞！
「呯！」
力道...
唔係講笑。
「呯！！」
譚國源就好似一隻失心瘋嘅癲狗咁，不斷用頭撞地，就連宋文德都無諗過佢會有咁嘅行動去回應，一時之間變得愣然。
「呀！！！！」最後嘅一撞，佢額頭、鼻孔、嘴巴都流出血液且發紫。
「呯！！！」
「......」宋文德靜靜咁俯視一動不動嘅佢。
譚國源失去意識，攤倒喺地。
「我哋係咪唔洗再扮死屍。」泉叔對於啱啱發生嘅事，完全唔覺得驚奇咁。
「佢暈咗！？」我上前，睇一睇佢有冇鼻息：「係暈咗......」
而宋文德隻眼好似仲諗緊啲咩，成個人未回神。
「宋文德？」我拍拍佢隻腳，以為佢俾呢一幕嚇親。
宋文德嘅眼中，更似係望緊將來。
的確，重生會嘅影響力大到可以任意叫一個信徒去死。
實在太可怕，一地都係來自譚國源身上嘅血跡。
「又要拖地，屌你老尾。」泉叔彷彿司空見慣，入廁所拎地掃。
泉叔拖地期間，宋文德就除返件求導袍落嚟，同埋收好吊咀，就好似回復返自己正常嘅身份一樣。
「你無事？」我再問一次。
因為，佢好似若有所思咁。
良久，宋文德先開聲：「呢個邪教......必須要被摧毀。」
「就同兔子人一樣。」我點頭。
「佢太可悲。」宋文德眼角移去昏迷嘅譚國源，說：「世上仲有唔知幾多，好似佢咁嘅人，喺人生絕處被利用嘅人......」
忽然間，我從宋文德身上感受到前所未有嘅使命感。
「呢啲，係民俗學家嘅工作？」我緩和一下氣氛，咁樣問佢。
「唔係，但研究民俗，自然會了解到好多不為人知嘅故事，當中包括唔少都市傳說，我自己都接觸過唔少。要識得判斷真偽，係民俗學家嘅第一步，而要判斷，你就只可以去試......」
「聽落真係一個，刺激嘅職業。」我就連佢宜家到底係講笑定講真都唔知。
判斷真偽依一回事，或者都需要勇氣。
之後嘅時間，宋文德再喺譚國源屋企搜證。身為民俗學家嘅佢，留意細微線索同分析，應該比我同泉叔都在行。