我反而俾佢強大嘅力氣，單方面壓住喺地上。
「嗚...嗄...嗚嗄......」佢一隻手撳我拎刀嘅手腕，一隻手撳我條頸。
佢殘留住不明昆蟲屍骸嘅牙齒，緩緩流出饑餓嘅唾液。
危急下，我拎出宋文德俾我塊「八方鏡」，用圓鏡照向兔子人。
如果唔係生死關頭，幾乎無逆轉嘅可能，我都真係唔會真係相信塊鏡係可以驅逐兔子人......
殊不知，正呈現紅目嘅兔子人望見鏡子後，喊出痛苦嘅撕叫聲，令我同宋文德有足夠時間脫身。
我哋兩個都唔理方向啱唔啱，走咗再算。
更恐怖嘅地方係，整片山區都有零仃嘅紅點出現。
嗰啲紅點，自然就係佢哋嘅「紅目」。
「點解...成座山都係......」毫無安全感嘅我，貼住一顆樹左望右望。
「可能......就係啱啱嗰下地搖嘅騷動，令到所有兔子人都聚集哂喺到。」
「所...所有...！？」
「我都係估......」
成段落山嘅路程，比想像中要困難。
如果要我講個情況俾你聽係咩感受，就係好似每一隻兔人，都代表住一個連環殺人犯。
而呢家，喺一座山入面......
有十幾個連環殺人犯，喺到搵緊你。
「啱啱嗰隻兔人同我之前遇嗰一隻唔同...我之前遇嗰隻，係著全白色戲服嘅兔。」
「啱先嗰隻，係著住工裝服......」宋文德留意到。
「佢哋到底係......？」我身心都就快崩壞。
「一個種族？定係一個有聯繫嘅家庭，兔子人數目到底有幾多，住嘅地方又喺邊，呢啲都係未知。」宋文德幫我羅列哂出嚟：「哈哈哈......我哋惹咗個可怕嘅對象。」
一諗到呢到，感覺距離我要救返女朋友嘅可能性，又再遙遠咗......
「捱...到六點。」我望下手機，說：「一有到朝早，佢哋就會散......」
我幾希望，泉叔宜家會出現。
但求人...
不如求己。
「繼續落山。」宋文德望住手錶。
「你望到路？」
「我隻錶可以當指南針用......」
我跟住宋文德，再次向某個看不見嘅方向前進。
黑暗之中，紅光特別顯著。
我同宋文德唔敢跑太快，果然係個好決定。
事關我哋跑到吊燈籠時，發現迎面嘅道路上有一隻兔人，留住長髮嘅兔子人。
佢拎住切肉刀，好似漫無目的咁細步細步而行，其間......
佢哼緊歌？
佢哼住奇怪、又帶有自己陰笑聲嘅不明音樂。
呢種要沉著冷靜應對，唔大跑大跳嘅時刻，反而更觸目驚心。我哋匿喺一片一顆樹後面，喺佢經過時更閉住呼吸。
從佢哼歌嘅腔調細聽，佢疑似係一隻兔女。
哼到一半，佢又突然低頭哀泣，神態十分詭異。
等佢慢慢遠離附近，我同宋文德先繼續心顫嘅逃亡之旅。就喺我哋跑唔夠十秒，去到要落一條石梯嗰陣，領頭帶路嘅宋文德突然仆親！成個人跌落翻滾到石梯下面......
「宋...！」
同時間，我發現地上有條繩，更糟糕嘅係隔離居然放住幾個汽水罐，宋文德咁樣仆一仆，間接令到嗰幾個汽水罐都滾落石梯下面。
「噹...噹...噹...噹噹...噹噹噹...噹噹噹噹噹！！」汽水罐每跌一級，就響一下。
我最唔想嘅事情，發生咗。
我回頭一望原本應該遠離我哋嘅紅目視線，已經回首瞪住我嘅位置。
我腦內一片空白，只有一個字......
「逃」
兔女發出鳥叫嘅怪聲後，即以凌厲嘅叫聲跑向我哋！
我跨級跑落樓梯，有幾下腳顫到差啲仆埋一份。
「宋文德！你點啊？佢追緊過嚟啊！！」我跑到落去見佢仲未起身，而係半跪緊喺地下，額頭仲滲住一行血。
夜裡喺山林周圍爬嘅曱甴，喺宋文德隻皮鞋上不斷攀爬。