拍攝者對鏡頭講：「我覺得我係時候要走...氣氛有啲唔對路。」就喺佢走嘅期間，拍攝者似乎驚動到一名教徒，令到吟唱中斷。
之後，就拍攝者不停嘅狂奔。
第三段影片，去到呢終斷。
「第四條影片，亦係最後一條。」宋文德撳制之前，說：「今日嚟之前，我都無諗過會搵到咁嘅一手資料。」
最後一段片，拍攝者已經被捉住。
咁表示呢段片拎機拍攝嘅人......
係信徒一份子。
吟唱嘅儀式繼續，其中兩名黑袍求導者將拍攝者本人拖去水井前......
「敬畏的神明啊，原諒我等祖先饕之罪，我願將凡世之羔羊饋贈」
唱到依段，兩名求導者將拍攝者活生生掉入水井之下。
「呯──」
「赤目赤目紅神目......」
「我等願意被召入樂園......」
影片結尾，拎攝影機嘅人意外影到其他人求導袍上徽章嘅標誌。
「重生會......」我呆若木雞，吐出呢三隻字。
「重生會？」宋文德今次問返我轉頭。
「我早前......遇過疑似邪教嘅機構組織，佢胸口上嘅徽章標誌，同重生嗰個logo係一樣。」我說。
「都合理......」宋文德托鄂分析，說：「佢哋喺影片中嘅行為，好符合邪教嘅標準。包括，少人組成嘅團體、過份重複嘅拜祭，同埋......活人祭獻。」
「但我唔覺得，拍攝者俾人掉入水井之後就死，因為佢條屍嘅樣，我記得係死不瞑目，而且表情扭曲......」講呢到，又一陣嘔感衝上喉嚨。
「而且佢後尾有俾人拎返上嚟，放喺寺廟到。」
「條片係幾時拍？個日子。」我問。
「上個月，三月二十號，春天來臨前夕。」
「......我覺得，呢個邪教同兔子人係有關連。」我沉默一陣。
「由佢首歌提到「紅目」兩隻字，我已經懷疑緊。」宋文德同意。
望下手機，仲有成晚要過，喺依條村到過。
呢場雨，真係落得好耐。
雖然外面環境令人不安，呢個地方更同重生會有所關連，但今晚至少唔洗一個人訓。
「你訓床，我訓地下就得。」我主動提出。
畢竟宋文德今日用咗咁多腦力，又俾咗塊「八方鏡」我，不過幾時先可以測試到塊鏡嘅真實性，就不得而知。
暫時追蹤兔子人嘅方法，好似得泉叔清楚？
宋文德好快就入眠，而我就望住天花板，好耐都未訓得著。聽住屋外間斷嘅雷聲，我無端諗返起Chloe。
以前一到雷雨夜，佢就會打俾我傾計。佢口裡講只係掛住我，實際上我早就留意到佢怕雷聲。
如果，如果人克服到佢畏懼嘅嘢，係咪就無敵？
然後，我又諗起泉叔。
我到底可唔可以好似佢咁，一路以嚟孤身往前？如果無佢，我諗自己一早歸西。
就喺我輾轉反側期間，我無意見到檯底下有一個小暗格。無聊嘅我伸手入去暗格空心嘅圓洞入面，察覺真係有啲嘢之後，就移開夾板。
然後喺裡面，發現另一本日誌。
名為《異鄉人》。
我用手機作照明，掀開一頁又一頁咁睇。
內容係似小說形式咁，講述某個女性嘅故事。
主角係個出生於古董生意家庭嘅女仔，由於傳統家族重男輕女觀念，佢為咗證明自己，而喺二十四歲嗰陣離鄉別井，搭船到他鄉想幫家族搵返一件失傳嘅寶物。
佢發現寶物遺失喺一條村落附近，於是就喺村內落腳。由於佢相貌秀麗，居民都好歡迎佢加入。
家族遺失嘅古董，係名為「八赤勾玉」嘅勾玉。
據聞喺古時，曾經被最出名嘅陰陽師，用於封印某樣古老而邪惡嘅存在。
本來我想睇落去解悶，點不知......
呢半小說寫到一半，就無再寫落去。
無結局嘅一個故事。
等等...
呢本嘢，睇落並唔係無結局......