鎖羅盆內村，深夜十點半。
隨住雨勢增加，空氣都變得冰冷。
宋文德嘅三件套西裝，揮發咗和暖嘅功用。相反，我身上多日未洗且濕透嘅襯衫，呢刻顯得特別單薄。
合眼小休咗陣嘅我，望見窗外嘅雨勢未停，睇嚟今晚都要喺到過夜。
一醒咗，就見到宋文德喺到睇緊攝影機嘅內容。
嗰部喺死屍身上得返嚟嘅攝影機......
「有咩睇...」我問。
「一段奇怪嘅...影片。」宋文德諗咗諗，應該唔識形容：「我反覆睇咗十幾次......」
「睇過。」我坐佢隔離。
宋文德沉默不語，將攝影機片段由頭播一次。
影片開頭，係夜晚，畫面７５％都係黑媽媽。
而且，疑似得拍攝者一個人。
拍攝者喺鎖羅盆村周圍咁探索，入荒廢嘅原居民屋企周圍開箱、開櫃。拍攝期間佢有一路加入少量旁白，描述自己拍到啲咩，自己又做緊啲咩。
根據旁白佢自己描述，佢係嚟夜晚靈探。
我有時幾佩服呢種人。
然後，第一條影片就結束。
「仲有第二條。」宋文德播埋第二條片。
第二條片開頭，係拍攝者好驚慌咁打開攝影機，因為鏡頭睇落有啲搖。
拍攝者：「啱啱喺間廢屋休息咗陣，無啦啦聽到外面有班奇怪人唱歌...。」
之後，拍攝者拎住攝影機偷偷從廢屋嘅窗口，拍攝外面大路嘅情況。果然，影到有一班不明人士捧住供燈，大約二十餘人整齊咁向某個方向前進。
佢哋全部著住黑色嘅求導袍，領頭嘅人則著住白色求導袍。最令人心寒嘅地方係，領頭嘅其中一位女子，口中一直喃喃唸唱住，一首詭異而哀怨嘅歌曲。
「赤日赤日紅神目......」
「我等願意奉上眼......」
「赤日赤日紅神目......」
「我等願意奉上耳......」
拍攝者：「...咩嚟？咁多人半夜上山？定拍緊戲......」
「呢首係民俗歌，偏近山歌。」宋文德一下子就聽出、斷定：「而且帶住客家話口音。」
拍攝者：「佢哋去邊？嗰到明明無路......」
影片影到嗰一群人行入山林，無按正常路行就結束。
「下一段片......」我想知道，之後發生咩事。
雖然嗰條屍，
已經揭示咗結局。
第三條片，拍攝者偷偷跟住嗰班人，入到去山林之中。由於前方嘅佢哋拎住供燈有微微嘅火光，拍攝者可以隱約跟蹤到佢哋。
期間，嗰股哀怨嘅歌聲無結束到，一直吟唱到巨大嘅海潮聲出現，都依然繼續。
「赤日赤日紅神目......」
「我等願意奉上臟......」
拍攝者：「好心寒...等等......前面係咪另一條村嚟？點解我無見過？」
拍攝者呢個時候，好明顯已經到達鎖羅盆內村。而佢亦無傻傻咁衝入去問人做緊咩，而係匿喺一旁嘅草叢，偷偷錄影住村內嘅一眾黑袍人。
可惜......
佢哋全部都戴上咗袍笠，以致無辦法清楚望到眾人嘅樣子。
著住求導袍嘅二十餘人，圍繞住村莊行一圈，最終以村內嘅水井作為圓心，圍成一個圈。
期間，終於唔再得嗰位哀怨嘅女聲唱歌，其他人都開始哀唱住宜首極度壓迫神經嘅歌。
「赤之天、赤之海、赤之山，我等正向你祭拜......」
「請你於逢魔之時紆尊降臨......」
「再聽落去我驚我頂唔順......」我從來無諗過，真係有歌可以令人唔舒服。
唔係曲風難聽嘅唔舒服......
而係哀怨聲之中帶出咗一點一點嘅絕望氛圍，令人唔想再聽。
拍攝者：「係邪教......？」
拍攝者將過程完全拍攝，求導者們誠懇地吟唱，唔知幾時開始，連天空嘅月亮都逐漸變得赤紅，風勢都漸大。