行到某一處，我哋直頭可以聽見海浪打到岸上嘅聲音。
「到。」呢個時刻，宋文德腳步亦停低。
而鎖羅盤內村嘅真貌，仍終於揭露喺我眼前。
荒廢、
枯樹、
冷風、
陰沉、
死寂。
可以用宜五隻詞語，概括成條內村嘅環境。
房屋數目明顯比外村多出十幾戶，理應更為熱鬧。
但地方就係更為陰深，彷彿終年不見天日。
而且海潮聲，更令寂寞感傳遞遍身。
身處香港呢一個角落，就感覺全世界得番自己一個存在。
「你以前......係自己入嚟？」我不禁咁問宋文德。
「嗯，對上都五年前。」宋文德開始領路：「係咪有好強烈嘅孤獨感？」
「係...」
「呢個就係內村詭秘嘅地方，好似入咗第二個空間咁。」
村內中央，係個枯乾嘅水井。周圍房屋嘅格局都大同小異，唔係用鐵皮做間隔，就係用磚頭搭屋。唯一有少少唔同嘅，係最遠處一間面海嘅寺廟。
「你上次喺到考古有咩得著？」我特登講下嘢，驅散恐怖嘅孤寂感。
「知道咗佢哋呢小撮人，應該話呢班鎖羅盆原居民，佢哋係有獨特嘅信仰......」宋文德一邊向前行，一邊講：「算係異教。」
「異教？」
「通常不被主流承認、不被世人所知、教義倫理缺乏嘅宗教信仰......都會被稱為「異教」。」
「咁呢班人拜嘅神係......？」
「因幡之白兔。」
「兔...？」
「嚴格上嚟講，佢係日本嘅神明嚟，但唔知點解會流傳咗喺宜個小村莊......」宋文德少有會疑惑：「除非有日本人曾經將文化，帶過嚟宜到。」
我哋嘅步伐，不自覺咁行到村裡最盡頭嘅寺廟。
由於環境昏暗，我要用手機嘅電筒先望到入面嘅情況。
向前照，係個兔樣銅像。
「呢到有啲臭。」我說。
「成幾百年無人嚟清潔過都正常，但我上次嚟都無咁臭。」宋文德說。
可能日久失修，年月消磨嘅關係，外形已經殘破不堪，睇唔清上面特別嘅雕刻。
「你帶我嚟，就係睇宜個？」我手機一垂低，意外照到銅像下一具奇怪嘅嘢。
我電筒對準嗰件黝黑嘅嘢，先見到嗰個本體......
係一具，屍體。
而臭味嘅來源，正正係屍體上發出。
「哇！！！」我同宋文德都嚇到退後，佢果然唔係全能。
「嗄...點解會有件屍體喺到......」我雙手拎住電筒，慢慢靠近屍體。
「我都唔清楚...我上次嚟嗰陣係無。」宋文德亦把住口鼻。
我慢慢行近屍體，發現佢以一個跪拜嘅姿勢，捲縮住身體咁死去。
「佢好似抱緊啲嘢......」眼利嘅宋文德發現。
經佢咁樣一講，我都發現屍體嘅懷中，抱住一部類似攝影機嘅物體。
我同宋文德對望一眼：「拎到？」佢問。
「應...該...得。」我盡可能想尊重屍體，用溫柔嘅方法拎出部小型攝影機。
但佢臨死之前，實在抱得太實，加上屍體死後會僵硬，要拎出嚟就難上加難。
我唯有心中默唸一句「對唔住」，繼而用腳踢到條屍翻身，再伸手去將佢四肢強行拉開，先拎出到部攝影機。
宜具屍體到死前嘅樣，係死不瞑目。
我唔知佢發生過咩事......
但相信攝影機入面，可能有答案。
「拎住。」我將攝影機交俾宋文德，續問：「你啱先話放心交俾我嘅嘢，係咩？」
「跟我嚟。」宋文德穿過寺廟後方小廊，通向外面一間比較簡陋、狹窄嘅房屋。