一落車，我不禁問：「其實要去邊？」
「鎖羅盆，有排行。」宋文德答。
「嗰個...傳聞...村民一夜消失嘅村莊...？」
「呢個只係傳聞嘅表面。」宋文德輕輕一笑，說：「唔洗太緊張，嗰到已經變成一個行山愛好者經常會去嘅地方，唔會話好恐怖。」
說畢，我哋兩個就開始行山入村。
從來無咩行山經驗嘅我跟喺宋文德後面，默默咁望住佢背影。
唔知點解，我總覺得佢斯文嘅表面下，係有另一面。
隨住我哋逐漸深入山林，花草樹木嘅氣息就越嚟越濃，河水流落嘅聲音好悅耳，仲有數之不盡嘅蟬鳴代替煩雜嘅車聲。
「你差西裝行山......會唔會好辛苦？」途中，因為我哋無咩點交流過，於是我搵下嘢嚟講。
「哈哈，唔會。」宋文德稍稍回頭，望向身後嘅我：「我都行過唔少次。」
「你每次嚟......都係進行考察？」
「好大部份情況係。」
原本我想打俾泉叔報一報平安，我諗佢都應該差唔多醒。
點不知呢到開始，手機已經收唔到訊號。
「當年香港仲係一個小小漁村嗰陣，鎖羅盆村都有一定數量嘅原居民，佢係陸上最難到達嘅村莊，去到會見到客家人房屋嘅佈局。因為靠山，所以主要以打獵為食，當時最經常食到嘅野味，就係兔。」宋文德開始好似一個老師咁講課。
「點解偏偏係兔？」
「因為山林上食得嘅動物嚟講，兔嘅繁殖能力係極強，佢哋多胎多產、孕期短、成熟早、全年發情，所以兔肉係會比較經常食到，哈哈，咁當然都要係出色嘅獵戶先捕捉得到，因為兔嘅警覺性都唔低。」
「出色嘅獵戶......」唔知點解，我諗起泉叔。
「講起獵戶，當時全條村主要靠兩戶家族去支撐野味嘅供應，佢哋人分別姓「許」同姓「周」，坐喺「外村」。」
「連人哋姓咩你都知......？」只能說，宋文德博學多聞嘅人。
「哈哈，當你要考博士學位，用三、五七年去研究論文內容，再進行反覆無數次嘅考察嗰陣，你就會連咁細微嘅嘢都要知道。」
佢比我想像中更厲害。
「所以，你係個香港民俗學博士？」我有點驚訝。
「嗯，但我從來唔會自誇。」
「呃...」我愣一愣，繼續問：「咁你啱啱講，佢兩家人坐喺「外村」，係咩意思？」
「即係住喺村嘅外圍，亦係一般行山客到步即止嘅範圍，因為如果要有入「內村」，係無正常山路行到過去......」
「點解嘅？」我似個不停發問嘅學生。
「因為當年日本侵華，有唔少日軍都曾經到過香港山上搜索、掃蕩，為咗躲避日軍嘅搜索，所以無整到行人嘅路通去「內村」。於是乎，一般人唔知，以為到達外村就到咗鎖羅盤，其實不然。」
「即係話，你去過內村？」我說。
唔知點解，宋文德停頓咗好耐先答：
「嗯。」
講下講下個天都開始陰陰地，有想落雨嘅跡象......
於是我哋兩個加快腳步，希望唔會淋到雨。
「沙啦沙啦──」五點半左右，天空終於傾盤大雨。