我將小布掀開，發現係一隻粉嫩帶紫嘅詭異手指。
而泉叔身上，都多咗啲新傷勢。
「我喺附近追蹤到佢，想射兔頭嗰陣，俾佢手擋住，但打咗佢一隻手指落嚟。」泉叔平淡地說。
「逃走咗......？」
泉叔點頭。
我慢慢閉上番眼睛，今晚唔不想再作思考。
最終，我哋駛返譚國源屋企。
宜晚，我身心疲倦到要由泉叔將我抱上房，放落床到休息。
我發咗個夢，一個好長、好遙遠嘅夢。
個夢係關於，我喺某個空無一人嘅小島上仰望天上昏紅嘅日蝕，世界彷彿俾絕望完全吞噬。
而我就慢慢行向島上嘅最高處，步向某個類似復活島上嘅石像。
下一秒，我喺石像內拎出......
拎出咩？我都見唔到，因為個夢宜到就結束。
一醒返，又要面對刺眼嘅陽光。
心痛嘅難受，依然喺心扉間徘徊。
唔同嘅係，我無再大哭大叫，而係沉靜起嚟。
沉靜得恐怖。
我面無表情坐咗喺張床上接近兩個鐘。
要泉叔發出鼻鼾聲，我先回神。
行出間房，就見到泉叔訓喺梳化上，檯上放咗好多包必理痛同安眠藥之類嘅藥物，佢琴晚都應該受咗唔少傷。
至於疑似係「重生會」教徒嘅譚國源，依然被綁喺另一間客房。
宜家係朝早十一點，但我仍然行屍走肉咁，唔知要做啲咩，做人嘅目標好似頓時失去哂咁，直到手機一則訊息傳嚟。
宋文德：「撐過了嗎？人尚在吧。」
係嗰位網友。
我：「係...」
宋文德：「你現在身處哪裡？找個地方約見吧。」
我：「沒所謂......」
宋文德：「兩點鐘，到旺角「卡門咖啡店」去。」
今次見宜位網友，我無打算叫埋泉叔。
一嚟係琴日受咗傷，應該要好好休息。
二嚟宜家係朝早，應該唔會有太大危險。
兩時正，我嚟到人來人往嘅旺角。
宋文德：「我早到半小時了，你上來了，就坐在角落的位置。」
間「卡門咖啡店」原來係間樓上鋪，而對方亦一早喺嗰到等緊我。
「你係...宋文德？」我走向角落，靠牆嘅位置。
佢抬一抬頭，對我點頭：「我係。」
無諗過，對方係個斯文嘅中年男士。三件套深啡色西裝、文青眼鏡、梳得整齊嘅頭髮，一身書卷知性嘅氣質。
「你好...就係我聯絡你。」我坐佢對面。
「可以點稱呼你？」
「阿政...」
「你都可以叫返我做宋文德，呢個係我真名。」
用真名上網......？
「所以......點解唔可以直視兔人，特別喺佢紅眼嗰陣。」臉如死灰嘅我，直接問佢。
或者，宜一刻就算知道答案都毫無意義。
但我知道......
仲有我，可以補救嘅事。
「當兔子人對某樣生物，擁有強烈殺意時，佢哋眼睛就會變紅。」宋文德開始講解：「俗稱「紅目」。」
我專心咁聽佢講。
「當人類一旦被兔子人用「紅目」直視......」
「兩位先生，請問想飲啲咩？」倏地，侍應出現。
宋文德頓一頓：「要杯黑啡，唔該。」
「我唔洗。」我答。
宋文德繼續講落去：「就會......」
「咁兩位，要唔要點嘢食？」侍應又返轉頭問。