老豆愣然咁望住我。
「痴線。」我笑一笑，說：「你下次都係搵區議員幫手啦，唔好再麻煩我。」
之後我返入房，躺喺張床上面。
呢幾日一直喺外面神經崩緊，直到返嚟自己真正嘅屋企，有自己家人陪伴嘅一刻，我先覺得真正安全，真正可以休息。
竟不經不覺，訓著咗。
訓醒嗰陣，已經七點半。
我即刻彈起身行出廳，發現老豆老母已經鋪好檯準備食飯。
我再打開手機，致電俾阿泉叔：「喂...」
「喂，點啊政，查咗成日。」
「泉叔你點啊？搵唔搵到嗰條友......」我問。
「搵到，仲審問緊佢。」
「審...問...？」
「協助調查咁盤問啫、盤問啫！」話畢，電話另一邊傳出隱約嘅叫聲。
「咁...有冇咩要幫幫手？」
「呃，一陣幫手買盒叉燒飯上嚟～加蛋啊。」
另一邊，今日上討論區搵到嗰位「宋文德」網友，佢仲未回覆我。
「食得啦政。」老母叫我埋位食飯。
食飯期間，我開始慢慢擔心。
因為宜個係，第一次無泉叔喺我身邊嘅晚上。
雖然咁講有少少Gay，但總覺得自己無佢咁嘅勇氣。
「你食得咁急嘅？」老豆問我。
「肚...餓。」
我快手扒多兩啖，就起身去著鞋。
「湯都未飲喎阿政......」阿媽叫住我。
「我下次返嚟再飲。」
出走廊之後，安全感更加低。
唔知點解我總有個預感，萬事有一就有二。
即使我唔主動搵兔子人，兔子人都會主動嚟搵我。
果然，最後宜個預感......
應驗咗。
就算喺等升降機期間，我全身都保持警戒住，樓層之間一有啲咩風吹草動，任何拉閘聲，我就會好似神經過敏咁縮一縮。
就連升降機打開門嗰下，我都好驚下一秒入面係有咩。
宜種心慌嘅心態，一直落到樓下人來人往嘅街道先至慢慢消除，呢一刻我先開始意識點解泉叔會有精神病，要食藥又要睇心理醫生。
好難想像......
佢長期一個人係如何面對。
我買咗盒叉燒飯後，根據泉叔俾嘅地址去到嗰位保安嘅住址，去到門口嗰陣拍拍門。
「仲諗住你夜少少先嚟。」泉叔咬住牙籤，喺單位入面開門俾我。
「嗯...」我無辦法開口去講，快嘅原因係因為自己一個太驚：「你嘅叉燒飯。」
入到嗰個公屋單位，我唔見嗰位叫譚國源嘅保安：「嗰個人呢......？」
泉叔指一指間房，我行到入去先見到個頭部俾人綁住膠袋、雙手雙腳俾繩綁住嘅男人。
「佢...死咗...？」
「無，太攰啫。」泉叔開始食叉燒飯。
「有冇問到佢點解要入我女朋友屋企？」
「佢一開始堅持係滲水問題，到我問佢有冇見到「蛋」嘅事，佢就一粒聲都唔出。」
「滲水點解要入埋佢細佬間房！？」
「算啦，佢唔會再講嘢，你睇佢十隻手指。」泉叔說。
一望之下，見佢十隻手指居然都滲滿血，全部指甲都俾人挖哂出嚟。
「......」我愣住。
「不過我有檢查佢信箱，佢似乎都係「重生會」嘅人，佢哋有書信來往......」泉叔說。
「有冇「重生會」嘅回郵地址？」
「無，所以應該係用人手塞入佢樓下個信箱嘅方式。」泉叔得出最後分析：「一個，隱密性好高嘅宗教團體。」
「宗教團體......」
「即係邪教。」