喺泉叔嘅照料下，我理智似乎一點一滴咁康復，至少諗起嗰隻兔子人時，唔會再驚到腳軟。
腳傷亦都好返啲，叫做喺短距離可以跑到下。
今日，亦係重返Chloe屋企嘅日子。
「阿政，呢把狩獵刀你自己收好，傍身用。」開車前，泉叔俾把武器我。
「咁你呢？」
「我成把槍喺到。」泉叔指一指身後。
「點解...你之前話得返最後三粒彈？啲獵槍子彈偷運唔到落嚟香港？」
「唔係，係因為啲子彈係特製，我祖傳嘅。」
「返到去事發地點...可以調查到啲咩？」
「大把。總之你要救返女朋友，就一定要喺春天結束前搵出畫有佢個樣嘅復活蛋。」
「泉叔你識將變成復活蛋嘅人變返做人類！？」
「唔識，但至少可以保證佢嘅靈魂唔會被吞噬。」泉叔了當地說。
如果泉叔所言屬實，咁就表示「復活蛋」係裝有本身嗰名人類嘅靈魂，而蛋殼一旦破碎，就形同魂飛魄散。
咁兔子人所謂嘅吞食靈魂，自然係收集呢啲復活蛋，然後打碎蛋殼，將入面鮮紅嘅蛋液吞入口。
希望我無理解錯。
好一大段車程後，終於再次返到嚟Chloe屋企樓下。
原本以為自己已經對眼前嘅大廈，無咩特別嘅抗拒，點不知一到步之後，雙腳就好似石頭咁郁都郁唔到。
泉叔見我郁唔到，就講咗句：「諗下自己女朋友。」
佢呢一句，稍為激勵咗我一下，令我可以動身步入大廈。
去到相熟嘅十三樓，即使係大白天，走廊嘅涼風都依然似係夜裡嘅暗風，輕輕喺我腳邊拂過。
「道門閂咗。」一行到去嗰個單位，我發現門開扭唔郁。
泉叔推一推我，示意讓開，然後喺外套拎出一件開鎖工具，喺門孔入面扭咗幾分鐘，估唔到真係打開到道門。
「咔噠」
入去之後，屋企入面嘅白燈仲開住，呢點令我有少少驚，因為就好似重返當日情景咁。
但今次唔同嘅係，泉叔都喺我後面。
「呢到嘅裝修都幾簡約。」泉叔周圍望。
一如所料，原本收集好放喺碗嘅復活蛋已經唔見哂，淨低嘅只有呢間毫無生氣嘅家。
入到嚟之後，雖然我一直回避Chloe細佬嗰一間房，但我知道總需要面對。
所以，我推開咗細佬道門。
望住床單...
已經乾咗嘅血跡。
我視線移去佢電腦檯上嘅相，心情有少少複雜，期間唔覺意掂到個滑鼠，觸發到一直待機模式嘅螢幕亮著咗。
而電腦畫面一開，就係細佬平時嘅實況網站，雖然佢平時得兩、三個忠實粉絲，事業高峰時期得十五個人在線觀看佢打機，但係都足夠......
因為實況網站嘅留言板上，佢嘅粉絲留咗重要嘅言論！
女人湯圓520：「佢係咪縮細咗...？」
蜘蛛小子：「台主直播訓覺？幾時可以再望到你家姐？」
Maryischinken：「表演魔術？喺張被入面唔見咗嘅？」
呢班人，明顯細佬變成蛋嘅過程......
於是我撳咗「重播」，返睇細佬嗰陣嘅情況。
我將時間軸拉去當日中午嘅時間，發現嗰陣細佬仲係好正常，對住部電腦實況打機。
因為佢買咗「眼仔」，所以可以錄埋佢自己個樣。
直至黃昏，佢期間不斷打呵欠，然後話自己太攰要上床休息一陣先，就係咁佢訓喺張床到。
我將時間較快嚟睇，發現驚人事情......
細佬佢一路訓，身體就一路捲縮，我原本以為自己普通訓覺轉下身咁，但直至佢縮捲到全身唔符合佢本身身形嘅比例時，我就知道出事了......
嗰日嘅黃昏，就如同逢魔之時，天空格外緋紅。