思潮不斷起伏，常掛念過氣經理祁文傑，想呀想，好想爲他提議一條出路。一天偶爾翻開「李小龍」，啊，對了，小寶、萬有、榕叔已埋堆，祁文傑、毛名威還有快將出獄的黃玉郎，若同時加入鄺氏，集合昔年精英，嘩！鋼鐵陣容，唔打得都嚇得啫；再加個黑鬼德，呢個提議有可能啫，厲害！厲害！嗱，前排鄺氏咪同總監牛佬分咗手嘅，跟住唔單止冇縮皮咁樣衰，仲大興土木，又招攬人才，間公司愈裝修愈美侖美奐，比起又殘又舊冇出色嘅「自由人」，當眞勁上幾皮。公司咁新淨，一定會令書刊銷量狂升啦。跟住招攬埋經理入主，總監名銜失而復得，小寶又可以騎住祁文傑，嘩！愈講愈似，今次小寶都算吔尾糊囉！
爲怕小寶冇收到祁文傑的應徵信，欠缺他的履歷、工作經驗資料，劉定堅一於喺專欄內代他寫得一清二楚。講眞，全行第一位漫畫監製、第一位總監，你估咁易請到呀？我冇錢，又冇既具規模又充滿歷史價值嘅漫畫公司咋，否則一定重金搶聘經理。你都咪話，日日睇住但監呢個人乜，監嗰條友物，都不知幾咁快感，正啫！
首先，必須列明清楚祁文傑的「哥厘」：㈠董慕節契仔
嘩！眞唔講得笑，董老乃當今鐵板神算專家。祁文傑身爲契仔，貼到咁近，只要老細講聲，自然能爲他問吓契爺，趨吉避凶易如反掌。有個生神仙傍住，有錢都揾唔到啫，發達啦。
㈡八卦週刊封面主角
D明星仔又除又剝，幾經犧牲至有機會有得做封面女郎。經理就醒囉，拍拖又登封面，甩拖又登，壹周刊亦上過封面，剩係呢份名氣就值回票價啦。試諗諗，如果有日小寶後面跟住個祁文傑，爲佢又攞皮喼又搖頭擺股，眞冇得頂啫！而且經理之後一定附加個爲經理攞皮喼嘅毛名威，咁嘅排場，殺死人啦！
㈢包保有戲飛送
咪話唔提醒嘞，「玉郎漫畫」專欄內經理幾乎期期送電影戲飛，身爲佢老細，照睇收飛都收到手軟啦。超值猛人，經理身價愈噏愈升值。
㈣識得揍仔洗廁所
當年玉郎入室弟子通通受過專業嚴格訓練，唔似得家陣D死親仔連揍仔、洗廁所、擅車接送彩蝶大姑娘都唔曉，簡直十九分可愛！
㈤識得請手下食菠蘿油飽
嗱，呢味人情味就相當獨家嘞，請手下吔幾銀嘢咁大把嘅菠蘿油飽下午茶，大庭廣眾大大聲宣佈，飲品就食自己。大恩大德大手筆，我學極都學唔到呀！
㈥訓練手下強勁腿力
經理訓示部下其中一式，要助理們站在面前任由教訓，試過一訓就訓足八、九個鐘，我就未有試過好比飛虎隊更嚴格嘅訓練。呢，關榮汝、廖瑞賢、毛名威、溫韋倫四大家將就慶幸受過刻苦教訓嘞。D手下他日腳瓜粗壯，眞眞要多得經理啫！
係咁咦寫吓就有六大優點，恐防長江實業、滙豐銀行、太古、新鴻基、新世界甚至美國政府都會加入搶奪祁文傑加盟行列。嗱，年薪三百九十幾萬咁抵玩嘅啫，有你大着數。話唔埋你請佢老人家，經理會附送親筆簽名、親筆漫畫公仔，永世保值，諗得過架，應該對我講聲多謝啦，乖！爲祁文傑撫今追昔
偉大的過氣經理祁文傑，二十年來初嚐「待業」滋味，查實喺佢未加入「玉郎」前，撈過邊瓣呢？勁囉，大球場執波仔是也！原來當年靑春的他精力充沛，讀完中二、三，智慧過人，諗住又有波睇又可以練習氣力走動，於是走去做執波仔。可惜大球場已關閉改建，否則經理轉職爲執波佬亦未爲晚也。然而做唔成執波，經理或可以完成多年前心願。話說當年佢投考過無線嘅藝員訓練班，可惜後來好似話因爲暗瘡問題而打退堂鼓，唉！太可惜了，若果當年這粒未來天皇巨星投身演藝行業，今日周潤發可能都要企歪。單係睇一幕經理扮小丑，嘩！七情上面肯定無懈可擊。而且好肯定經理有資格自編自導自演，成場戲有佢講冇人講，但手指指你點頭話知，簡單中見功架熟練。我對經理嘅演藝潛質有十九分信心，佢一定掂嘅。再唔係拍齣「指出彩虹」，指指吓就可以指出彩虹，駛畫嘅咩？呢條橋夠絕啦，簡直絕過絕症呀！
講開揾嘢做，當年自己加入漫畫行業，其中主要因素亦係受經理影響。話說多年前仍在無線捱份編劇仔時，因爲某些原因致電經理。嘩！接電話嘅竟然係把聲好甜嘅女秘書黛安芬，我當堂一窒——二十零歲，有點讀過書，喺間大機構做到經理，又管幾百人又有房坐，仲有個秘書接電話，好威啫！就係佢嘅成就激勵劉定堅決意勇闖漫畫圈，諗住冇經理咁叻，有佢老人家一半成就都光宗耀祖啦！一做就做咗八年多，終於發現，原來撈漫畫管理實在太容易！秘書嘛，我有兩個添，甚至乎建立一間漫畫公司都唔見得係冇可能，「依司喈」之極。當我意氣風發之時，才看見經理慢條斯理、氣定神閒執包袱離開玉郎。陰公，劉定堅眞係眼淺，成績有幾勁又點啫？你睇吓經理吖，輕輕的來又淡淡的去，不帶走一片雲彩，呢份高人灑脫，豈是凡夫俗子如我者能做到！「歡樂令宵」D老餅藝員走頭都話切吓蛋糕吖，經理隱沒於靜悄悄。嗱，呢味「低調」，低頭被調，調你老遠，調你出局，無聲無息。調你呀，吹咩？吖，冇聲出，簷前滴水，點點依舊痕，點到你唔服？！
有好多人對今時令日嘅祁文傑，又話佢冇得撈，折墮囉！我點睇？錯，大家都錯了！今日嘅經理，好可能同耶穌一樣，被釘死於十字架，係爲世人贖罪啫。你睇，家陣嘅漫畫圈咁醜惡，就如好似劉定堅呢亭邪魔竟可以也文也武，正是小人得勢，忠良被害。爲要命畫壇蓬勃，一定要革命，要革命就必然要流血，要犧牲。我不入地獄誰入地獄？經理好可能本着捨己爲人嘅俠義心腸，讓出數百萬年薪職位，一年幾百萬喎，可以養活多少人呢？咁Q偉大，睇嚟同佢整個銅像都係時候囉。之不過如果唔整銅像，慳皮D整個「沙
像」，用沙包紮個經理人像，豈不更過癮、更受歡迎嗎？畫埋副尊容上去，任由行內人玩插眼、踢下陰，打一嘢收十皮，收收埋埋買晒菠蘿油包回贈經理，盞鬼啫！第七勢力
原名爲文啟明的鄺氏總監牛佬，據悉終於在年頭與上官小寶決裂，並聯同封面製作主力陳科琳、勾稿徒兒倫裕國及起稿首徒邱瑞新即將另起爐灶，自立門戶。企圖繼自由人、玉郎、鄺氏、天下、龍乘風、好老友後，成爲第七勢力。
漫畫圈是現實的殘酷競爭世界，要建立灘頭陣地，實力比金錢更爲重要。以牛佬爲首的新力量，能否創造歷史，還是失敗告終呢？就讓劉定堅先爲大家分析一下牛家班的整體實力，才作論斷。
牛佬在玉郎時期最得意爲當「如來神掌」一書草圖主筆，地位與張萬有一樣，一直以來並無其他突出表現。直至八六年玉郎上市，並於九月正式搬往灣仔港灣中心大本營。牛佬往視察工作位置，竟發現原來的大房變了細房，間隔亦不是到天花頂，門口連可以上鎖的大門也沒有。反而原來擁有同自己相同工作房的張萬有，房間比以前更大，更且是大單邊位。黑鬼德、李高這次一等的勾身主筆，工作房間與自己完全相同，這即表示地位相對下跌。一氣之下，那就爆發了牛佬脫離玉郎事件，經一陣子合約風波，牛佬加盟鄺氏。
入主鄺氏是牛佬能力的大躍進，首先把「愛情故事」大革新，摒棄原先的言情內容，扭轉爲以賣弄色情爲主的路線，銷量立即勁升。聞說最高曾升至五萬大關。在牛佬主政後，鄺氏的確熱鬧非常，他一手策劃把小威公司的眾多精英撬走，令鄺氏聲威大震：再加上老馮、劍僑、洪永仁、大衛兒等相繼加盟，志文的崛起，鄺氏全盛時期來了。「李小龍」、「愛情故事」、「笑旦漫畫」、「鬼書皇」本本賺大錢；加上「戆男漫畫」、「射鵬英雄傳」及栢迪最初挑大樑的「人鬼神」，七本期刊以震驚之勢把牛佬神話推至高峯頂點。他只要插手那一本書，銷量便立時上升，活像魔術師變戲法，實在令人目不暇給。
牛佬主宰一切行政管理，在他悉心培育徒兒接班同時，不少主筆相繼因備受冷落或不滿而離去。志文、劍僑、永仁、老馮、大衛兒，最後連戆男、栢迪、牛佬等亦求去過檔自由人。在人事大變動的不穩時期，牛佬一夫當關，調派二徒弟肥良助陣「鬼書皇」，一套「我若爲皇」挽回劣勢，更成爲日後鄺氏之寶；『大哥大』臨急臨忙殺出，阻截「愛殺」勁勢；及後又以「午夜奇談」硬拚玉郎推出的「怪談」。可惜連場殺戰，疲態漸露，致命傷是「愛情故事」銷量急挫，最後竟要執笠。『大哥大』亦遭遇同一命運，「李小龍」銷量輾轉下挫，形成肥良一書獨大，徒弟功高蓋師，終於導致最後反目，肥良一怒而去。
近年牛佬連番試新書失利，只憑一本以黑社會爲題材的「江湖大佬」掙得二萬多一點的銷量穩住陣腳。全年計算，牛佬領導下的鄺氏成績疲弱，花紅自是難以討好，最後導致與小寶決裂的無奈結局。可能由於如今競爭太過劇烈，加以由兄弟班組成的公司組織性較弱，面對問題一大堆，本人未敢過份樂觀。牛佬畢竟已疲，拚勁已今非昔比；加上太多股東分錢，更且必須出版兩本週刊才較化算，壓力加大。然而背城一戰，加上牛佬手本黑社會題材書刊未玩殘，相信維持公司一般開支並不困難。只是要再起風雲，便要看看天時、地利、人和三者配合了—在此謹祝新創業者事事順利，共勉！