近日身旁不少朋友好鬼忙，忙乜呢？嘩！原來是趕着「入貨」，匆匆忙忙跑到相熟的店鋪購買三級影碟及影帶是也。
由於太多人投訴色情三級影帶充斥報攤，那些爲民請命的議員們不斷炮轟，可憐的有關政府官員被問得口啞啞，終於要面對問題，向三級物品開刀。做官嘅，有乜法寶呢？唔駛問，佢至叻就係訂定「法律」，擬定新法律條例，通過後向有關人士作出檢控。由於有法爲據，此後也文也武，誰敢不從，拉人封艇，問你怕未？唔怕官，至怕管就係咱解！
新提議立法的有關管制二級及三級色情、不雅物品條例，本來是首要針對充斥報檔的三級鹹帶，但爲了一網打盡，有關官員認眞誇張，簡直自封爲聖人使者。新草擬條例建議一切被色情物品審裁處評定爲三级物品的影碟、影帶、均一律禁止「出售」及「租借」，你可以擁有俾自己「享用」，但如果借俾朋友分享「三级快樂」，慘囉，最高刑罰可能要坐監，死未？老細，了解淸楚如果有關條例通過，會有乜後果呢！舉例來說，譬如今日你擁有一隻「九個半星期」又或者「天使追魂」甚至係一隻普通嘅鬼片影碟，閣下貪過癮手痕借偉朋友睇睇，慘囉，你好可能已經犯法，將要面對一場又一場的官司，最低限度唔該你揸定三、五萬請律師先啦。
由於電檢處評定爲二級的電影，色情物品審裁處並不一定會有相同見解，佢哋可能將該隻影碟或影帶評爲三級，擁有該「物品」又或借俾朋友欣賞的人便可能詖起訴。係二級定三級呢？咪以爲政府會叫色情物品審裁處逐一預先評審再作公佈，如果眞係咁，睇怕納稅人都要俾多好多稅款至掂囉！大佬，咁自己點知邊D影碟、帶至係三級呀？政府邊有咁煩氣慢慢教閣下吖，等我教番你兩度啦！首先，你要將手上嘅影碟或帶攞上去色情物品審裁處，塡好份表格，交上影碟或帶，再交出大約係一千大元，咁有關方面就會爲你評審你手上嘅影碟或帶係第幾級呢，若然評定爲二级，恭喜你囉，你可以借俾朋友睇，而唔需要驚被告嚟。
借隻影碟俾朋友睇都要咁煩？咩呀，官字兩個口，你唔駛煩咪要佢嚟煩？你都戆居嘅，收口！試問全港有咁多影碟、影帶，一下子通過法例，D租帶公司點算呢？佢哋一樣唔知邊D先係二級，邊D至係三級。因爲電檢處嘅評定並不等如色情物品審裁處嘅評定。好嘞，就算兩大機構通過評定可以相通嘅，但係一般市民，試問又有乜途徑可以知道手上以前錄低嘅影帶係二級定三級呢？如果你擁有從外國購入嘅影碟重煩，根本未可能評定過，就算評審過，但係有關方面可能會要求送檢的電影公司剪掉一些鏡頭才評定爲二級，你從外國購入影碟，知鬼咩，咁就可能隨時犯法。
要是毫無修改地通過以上法例，香港市民相信會煩到飛起，色情物品審裁處工作量大增，一般地方法院認眞唔得間。一般靑少年挑戰權威，以擁有三級片影帶爲立威象徵將會廣泛起來，而租帶公司唔駛講慘到暈，D電影製片家及代理商平白損失一大筆，創作自由被局限，眞係要佩服度呢D條例嘅大官，你咁鬼醒，抵你紮職囉，隂公！
色情泛濫是世上一切先進城市的必然，紐約、東京、巴黎、倫敦、台北……皆因富裕者以放縱色慾換取一刹那快感是人性之自然，一般民眾寄情色慾以發洩抑鬱、苦悶，也是城市人的必然現象，無甚稀奇，奇就奇在我們社會混雜了不少思想色情、嘴巴潔淨的假聖人，他們爲了自己的地位，不惜顚倒是非，反轉自然，企圖推翻人類本性，迫使一切民眾食長齋，學習做聖人！共產主義迫人認同大家做窮光蛋、食穀種代表人人平等，平等便會快樂；港英政府的無聊官家仲勁，規定成年人只準睇三級片，唔准租借，一定要買，仲要喺外地買。遲吓可能講粗口都要拉去坐三、五日監，要是你收入有限，無錢買飛睇周弘除衫，更加無銀搭飛機去外国入貨，咁點呢？你抵死囉，唔准租呀，借都唔得！有錢人就有得睇嘞！窮鬼學乜人睇三级片呀，吹漲！
如此白痴、戅居、無聊法例竟然會準備提交立法局，港英官員之無能已達至令人難以容忍程度，唔該醒少少啦，大家靠呢班官，點捱到九七呢？九七之後，又點呢？天呀，唔該恩賜些少智慧俾班冷氣房內的大哥大姐，唔該晒，些少智慧足夠喇！